डिचोली: कारापूर-सर्वणच्या रिक्त सरपंचपदासाठी मंगळवारी (ता. ३०) निवडणूक होणार आहे. सकाळी ११ वाजता पंचायत मंडळाची बैठक होणार आहे. सध्या वादग्रस्त प्रकल्पावरून कारापूर गावातील वातावरण तापलेले आहे.

वादग्रस्त प्रकल्पावरून आंदोलनकर्त्या लोकांनी यापूर्वी पंचायतीत घातलेला गोंधळ पाहता, सरपंचपदाच्या या आव्हानात्मक खुर्चीवर आता कोण विराजमान होणार, याकडे पंचायत क्षेत्रातील जनतेचे लक्ष लागून राहिले आहे.

दरम्यान, सत्ताधारी गटातर्फे सरपंचपदासाठी बिंदिया सावंत यांचे नाव निश्चित झाले असून त्यांचीच सरपंचपदी निवड होणार असल्याचे जवळपास स्पष्ट आहे. एकूण अकरापैकी सत्ताधारी गटात सात पंचसदस्यांचा समावेश आहे.

पाचव्या सरपंचाचे वेध

गेल्या १६ जानेवारी रोजी दिव्या नाईक यांची सरपंचपदी निवड झाली होती. मात्र त्यांनी चार महिने पूर्ण होण्याआधीच, दीड महिन्यांपूर्वी तडकाफडकी राजीनामा दिला. त्यामुळे सरपंचपदाची खुर्ची रिक्त आहे. विद्यमान पंचायत मंडळाच्या कार्यकाळात आतापर्यंत या पंचायतीला चार सरपंच मिळाले आहेत. आता पाचव्या सरपंचाचे वेध लागले आहेत.