कदंब महामंडळात २०१८ साली रोजंदारी तत्त्वावर भरती झालेले १५ बसचालक आणि १५ बसवाहकांना गुरुवारी कायमस्वरूपी नोकरी मिळाल्याचे नियुक्तीपत्र महामंडळाचे अध्यक्ष उल्हास तुयेकर यांनी दिले.

यावेळी उपाध्यक्ष क्रितेश गावकर देखील उपस्थित होते. २०१८ मधील तुकडीत कामाला रुजू झालेल्या काही कर्मचाऱ्यांचे दीर्घकाळापासूनचे स्वप्न चतुर्थीपूर्वी पूर्ण झाल्याने त्यांना 'बाप्पा पावले' अशी चर्चा कदंब महामंडळात सुरू आहे.

नियुक्ती पत्रे मिळाल्यानंतर कर्मचाऱ्यांनी महामंडळाचे अध्यक्ष आणि उपाध्यक्षांचे आभार मानले. आम्ही अनेक वर्षांपासून या दिवसाची वाट पाहात होतो आणि चतुर्थीपूर्वी आमचे स्वप्न पूर्ण झाले आहे. आम्ही महामंडळाला अधिक चांगली सेवा देण्याचा प्रयत्न करू, अशा प्रतिक्रिया कर्मचाऱ्यांमधून उमटल्या.