Kadamba Transport: पगारवाढीच्या मागणीसाठी अचानक संपावर गेलेल्या कदंब महामंडळाच्या इलेक्ट्रिक बस चालकांनी संप मागे घेतला आहे. एकूण 150 चालक सहभागी झाले आहेत. पैकी 50 चालक आज, शनिवारी हजर झाले. तर उद्या रविवारी उर्वरीत 90 चालक हजर होतील, अशी माहिती कदंबचे सरव्यवस्थापक संजय घाटे यांनी दिली आहे.

दरम्यान, कुणीतरी भडकावल्यानेच हा संप झाल्याचा आरोप घाटे यांनी केला आहे. शुक्रवारी हे बसचालक संपावर गेल्यावर कदंब वाहतूक महामंडळाने हा संप बेकायदेशीर ठरवला होता. तसेच संपावरील चालकांवर अत्यावश्यक सेवा (एस्मा) कायद्याखाली कारवाईची तयारी सुरू केली होती.

अकस्मात संपावर जाणे म्हणजे सर्वसामान्यांना वेठीस धरणे आहे. या चालकांचा कदंब महामंडळाशी थेट संबंध नाही. ते खासगी कंपनीसाठी काम करतात, असे कदंबच्या वतीने सांगण्यात आले होते.

कदंब महामंडळाने या 51 बसेस ‘ऑलेक्ट्रा’ या खासगी कंपनीकडून भाडेतत्त्वावर चालविण्यास घेतल्या असून त्या बसेसवर हे कंत्राटी चालक आहेत. संपामुळे या 51 बसेस बंद राहिल्या होत्या. या बसचालकांनी पगारवाढीची वाढ व्हावी, अशी मागणी करत दरमहा 25 हजार मानधन हातात मिळावे, अशी मागणी केली होती.