पणजी: दरवर्षी 120 कोटी रुपयांचे सरकारी अनुदान घेणारे कदंब परिवहन महामंडळ (Kadamba Transport Corporation) अनेक कारणांमुळे नुकसानीत चालले आहे. त्यातच कोरोना महामारीमुळे (Covid-19) राज्यात लागू करण्यात आलेल्या संचारबंदीमुळे (Curfew) कदंब महामंडळाच्या 417 बसेस बंद ठेवाव्या लागल्या होत्या. त्यामुळे कदंब महामंडळाचे (Goa Kadamba Bus)दररोज 20 लाख रुपयांचे नुकसान होत होते. मात्र, आता या स्थितीत सुधारणा झाली असून राज्यात वेगवेगळ्या मार्गांवर सध्या 117 बसेस धावत आहेत.

आता राज्यात कोरोनामुळे संचारबंदी असली तरी 50 टक्के कदंबच्या बसेस सुरू करण्याची परवानगी देण्यात आली आहे. मात्र, कोरोना संसर्गाच्या भीतीमुळे प्रवासीच नसल्यामुळे सध्या कदंबच्या फक्त 117 बसेस विविध मार्गांवर सुरू होत्या. त्यात आता तीन आंतरराज्य मार्गावरील बसेसची भर पडली आहे.

बुधवारपासून मुंबई, पुणे आणि बंगळुरू या तिन्ही महामार्गांवर दररोज सायंकाळी पणजी कदंब बसस्थानकातून प्रत्येकी एक बस सुटणार आहे. ती बस सकाळी ठरावीक स्थानावर पोहोचेल. त्यानंतर तीच बस सायंकाळी त्या ठिकाणाहून सुटून दुसऱ्या दिवशी पणजीत दाखल होईल. अशाप्रकारे या बसेसचे वेळापत्रक तयार करण्यात आले आहे.

मुंबई, पुणे, बंगळुरू मार्गावर आंतरराज्य सेवा

कोविड महामारीमुळे बंद असलेली गोवा कदंब महामंडळाची आंतरराज्य मार्गावरील बस सेवा काही काळ बंद होती. आता ही सेवा टप्प्याटप्प्याने सुरू करण्यात येत आहे. याअंतर्गत आज बुधवारपासून मुंबई, पुणे आणि बंगळुरू या तीन महामार्गांवरील कदंब बसच्या फेऱ्या वाढणार आहेत. मात्र, या बसमध्ये कोविड लसीचे दोन डोस पूर्ण झालेल्या प्रवाशांना प्रवेश दिला जाणार आहे, अशी माहिती कदंब महामंडळाचे सरव्यवस्थापक संजय घाटे यांनी दिली. या बससेवा सुरू झाल्यानंतर प्रवाशांकडून कसा प्रतिसाद मिळतो, यावरून पुढील निर्णय घेतला जाईल, असेही त्यांनी सांगितले.