Goa: मोपा येथील मनोहर आंतरराष्ट्रीय विमानतळ गुरुवार, 5 जानेवारीपासून कार्यरत होणार असून प्रवाशांची गैरसोय होऊ नये, यासाठी वाहतूक व्यवस्था करण्याचे प्रयत्न सरकारकडून सुरू आहेत. याचाच एक भाग म्हणून विमानतळावर कदंब महामंडळाची बससेवा सुरू होणार आहे.

‘कदंब’च्या 6 इलेक्ट्रिक बसेस सेवेत असणार आहेत. मोपा - पणजी - मडगाव, मोपा - म्हापसा - कळंगुट, मोपा - म्‍हापसा - पणजी या मार्गांवर बसेस सेवा देणार आहेत, अशी माहिती महामंडळाचे महाव्यवस्थापक संजय घाटे यांनी दिली.

पर्वरी येथे पत्रकार परिषदेत ते बोलत होते. मोपा-मडगाव रूटसाठी 500 रुपये शुल्क असेल, तर मोपा-पणजी 250, मोपा-कळंगुट 250, मोपा-म्हापसा 200 असे शुल्क निश्‍चित केले आहे. प्रारंभी हेच दर असतील. मात्र, नंतर आवश्‍यकतेनुसार ते बदलण्यात येतील. सकाळी 10 वाजता मोपावर पहिली बस पोहोचेल.

मध्यरात्री 1 वा. शेवटची बस मडगाव मार्गावर असेल. कोणत्याही वेळेला विमानतळावर पोहोचणाऱ्यांना बस उपलब्ध असेल, याची खात्री महामंडळाने केली आहे, असे घाटे यांनी स्पष्ट केले.

‘कदंब’चेही ॲप

आता कदंबच्या बसेसचे बुक माय ट्रीप, रेड बस आणि गोवा माईल्स ॲपद्वारे बुकिंग करता येईल. मोपासाठी 9 मीटर लांबीच्या बसेस मागवल्या आहेत. सध्या 49 प्रवाशांची क्षमता असलेल्या 12 मीटर लांबीच्या बसेस वापरल्या जातील.

‘कदंब’च्या सर्व बस सेवेसाठी पेटीएम कंपनी ॲप तयार करत आहे. आंतरराज्य आणि राज्य बसेस कुठल्या मार्गावर कुठे आहेत, याची माहिती या ॲपवर मिळेल, असे घाटे यांनी सांगितले.