मोरजी : मंत्रिपद कुणाला नको, सर्व 40 आमदारांना मंत्रिपद हवे आहे. आपल्याला मंत्रिपद मिळाले तर ते आपण आनंदाने स्वीकारु, परंतु मगोचे नेते आमदार सुदिन ढवळीकर यांच्या सूचनांचे पालन करु, असं वक्तव्य मांद्रेचे आमदार जीत आरोलकर यांनी केले आहे. स्थानिक पत्रकारांनी तुम्हाला मंत्रिपद मिळेल का, असे छेडले असता जीत आरोलकर यांनी सूचक वक्तव्य केलं आहे. आरोलकर यांच्या वक्तव्याने अनेकांच्या भुवया मात्र उंचावल्या आहेत.

भंडारी समाज (Bhandari Community) समितीने आपल्याला मंत्रिपद मिळावे,अशी प्रसार माध्यमातून मोठ्या प्रमाणात मागणी केली आहे. याविषयी आपल्याला माहिती आहे. परंतु मगोचे नेते सुदिन ढवळीकर जो निर्णय घेतील, तोच आम्हाला मान्य राहील, असे सांगून चाळीसही आमदार निवडून आलेले आहेत आणि त्या सर्वांना जर मंत्रिपदाची ऑफर दिली, तर कुणीही ती नाकारणार नाही,असा टोला आमदार आरोलकर यांनी हाणला.

तुम्हाला मुख्यमंत्री डॉ. प्रमोद सावंत (Pramod Sawant) किंवा भाजपने मंत्रिपदाची ऑफर दिली. आणि त्या बदल्यात तुम्हाला भाजप प्रवेशाची ऑफर दिली. तर ती तुम्ही स्वीकारणार का? यावर त्यांनी लगेच स्पष्ट केले,की आपण मांद्रे मतदारसंघावर पोट निवडणूक (Election) लादणार नाही, आणि ती निवडणूक जनतेलाही परवडणार नाही. जनतेने आमदार म्हणून पाच वर्षे निवडून दिले आहे, त्यामुळे मांद्रेच्या विकासावर आपण लक्ष केंद्रित करणार असेही आरोलकर यांनी सांगितले.