डिचोली: ‘अग्निदिव्य’ आणि हजारो भाविकांच्या साक्षीत शिरगावच्या श्री लईराई देवीची जत्रा अभूतपूर्व उत्साहात साजरी झाली. शुक्रवारी पहाटे श्री लईराई देवीने ‘अग्निदिव्य’ केल्यानंतर पारंपरिक पद्धतीने जत्रेची सांगता झाली. तर आजपासून (शुक्रवारी) कौलोत्सवाला सुरवात झाली असून सोमवारपर्यंत हा कौलोत्सव साजरा करण्यात येणार आहे.

दरम्यान, यंदा देवीच्या धोंड भक्तगणांमध्ये 800 नवीन धोंडांची भर पडली आहे,अशी माहिती मिळाली आहे. दोन वर्षांच्या खंडानंतर पारंपरिक जत्रा साजरी झाल्याने यंदा शिरगाव गावात भक्तांचा महापूर लोटला होता. गुरुवारी सकाळपासून रात्रीपर्यंत पारंपरिक विधी आणि कार्यक्रम झाल्यानंतर श्री लईराई देवीच्या कलशाचे जयघोषात होमकुंड स्थळी आगमन झाले.