केपे: जांबावली येथील ध्यान फाऊंडेशनची गोशाळा भाडोत्री गुंडांचा वापर करून मध्यरात्री जमीनदोस्त केल्याची तक्रार केपे पोलिसांत दाखल करण्यात आली आहे. याप्रकरणी जांबावली देवस्थानचे अध्यक्ष मंजुनाथ दुकळे आणि प्रवास नाईक यांच्यासह सुमारे १५० जणांविरोधात गुन्हा नोंद करण्यात आला आहे.

गोशाळा पाडल्यामुळे तब्बल ३०० गोवंश, लहान वासरे आणि आजारी गायींना मुसळधार पावसात उघड्यावर सोडून देण्यात आले असून अनेक गायी जंगलात पळून गेल्याचे तक्रारीत म्हटले आहे.

याप्रकरणी केपेचे पोलिस निरीक्षक प्रशाल देसाई यांच्याशी संपर्क साधला असता, दुकळे, नाईक आणि अन्य दोन संशयितांसह १५० अज्ञात व्यक्तींविरोधात गुन्हा नोंद केल्याचे त्यांनी सांगितले. यासंदर्भात देवस्थानचे अध्यक्ष दुकळे यांच्याशी संपर्क साधण्याचा प्रयत्न केला असता त्यांचा फोन बंद होता.

गोशाळा ही देवस्थान समितीच्या जागेत असून त्या जागेत आणखी एक प्रकल्प उभा करण्याचे ठरविल्यानंतर ध्यान फाऊंडेशनने ही जागा खाली करावी, यासाठी समितीकडून यापूर्वी प्रयत्न झाले होते.