Goa Kidnap Case: नुवे येथे निर्जनस्थळी सापडलेल्या त्या अल्पवयीन मुलींपैकी एकीवर लैंगिक अत्याचार झाल्याचे उघड झाले आहे. हे प्रकरण अत्यंत गुंतागुतीचे असल्याने मायणा-कुडतरी पोलिसांनी अत्यंत गोपनीयता बाळगली आहे. सध्या तपास सुरू असल्याची माहिती पोलिसांनी दिली.

मायणा-कुडतरी पोलिस ठाण्याच्या हद्दीतून बेपत्ता झालेल्या चार मुलींना पोलिसांनी शाेधून काढले होते. यातील तीन मुली अल्पवयीन असून, पोलिसांनी पाच संशयितांनाही अटक केली होती.

याप्रकरणी पोलिसांनी देमेतियस फर्नांडिस (१८), काइमिक्स कुतिन्हो (१९), माविन कुतिन्हो (१८), नोवेल फर्नांडिस (१९) व अझिम अहमद (२१) या युवकांना अटक केली आहे. ‘त्या’ मुलींना या संशयितांनी नुवे येथील डोंगरावरील एका निर्जनस्थळी नेले होते.

मुलींना ताब्यात घेतल्यानंतर पोलिसांनी त्यांची वैद्यकीय तपासणी केली असून, त्याचा अहवाल पोलिसांना मिळाला आहे.

शुक्रवारी (ता.२७) पोलिसांनी महिला पोलिस अधिकाऱ्यासमोर पीडित युवतीची जबानीही नोंदवून घेतली. त्यात पीडितेवर लैगिंक अत्याचार झाल्याचे स्पष्ट झाले आहे.

अपहरण म्हणून प्रकरण नोंद

अपहरण म्हणून पोलिसांनी हे प्रकरण नोंदवले आहे. संशयितांविरोधात भादंसंच्या ३६३ व गोवा बाल कायदा कलम ८ अंतर्गत गुन्हा नोंद केला आहे. मंगळवार, २४ रोजी या मुली बेपत्ता झाल्या होत्या. त्यासंबंधी मायणा-कुडतरी पोलिस ठाण्यात रितसर तक्रार नोंद झाल्यानंतर पोलिसांनी तपासाला सुरवात केली. पोलिस निरीक्षक अरुण गावस देसाई यांच्या मार्गदर्शनाखाली उपनिरीक्षक प्रशांत भगत यांनी त्या मुलींचा व संशयितांचा शोध लावला.