पणजी: पणजीत रविवार ९ नोव्हेंबर रोजी आयोजित करण्यात आलेल्या ‘आयर्नमन ७०.३ गोवा’ या आंतरराष्ट्रीय क्रीडा स्पर्धेमुळे पणजी, मिरामार आणि कुठ्ठाळी परिसरातील अनेक प्रमुख रस्त्यांवर वाहतुकीत मोठे बदल करण्यात आले आहेत. दरम्यान, वाहतूक पोलिसांनी नागरिकांना सहकार्य करण्याचे आणि त्यानुसार प्रवासाचे नियोजन करण्याचे आवाहन केले आहे.

मेरशी सर्कल ते नवीन झुआरी पुलापर्यंतचा (वेर्णा बाजू) डावीकडील मार्ग आणि दिवजा सर्कल ते मेरशी सर्कलपर्यंतचा डावीकडील मार्गन फक्त स्पर्धेसाठी वापरला जाणार आहे.रायबंदर - पाटो ते दिवजा सर्कल दरम्यानचा रस्ता, डी. बी. मार्ग, दिवजा सर्कल ते मिरामार सर्कल दरम्यानचा नदीकिनारी मार्ग (उजव्या बाजूची लेन), डॉ. जॅक सिक्वेरा मार्ग :

मिरामार सर्कल ते एनआयओ सर्कल दरम्यानची मिरामार उजव्या बाजूचा मार्ग आणि एनआयओ सर्कल ते राजभवनकडे जाणारी उजवीकडील लेन स्पर्धा संपेपपर्यंत वाहतुकीसाठी बंद ठेवण्यात आल्याची माहिती वाहतूक पोलिसांनी दिली आहे. पणजी ते मडगाव दिशेकडील लेनमध्ये बदल करण्यात आला आहे.

नवीन उड्डाणपुलाच्या सुरुवातीपासून (शरयू टोयोटा शोरूमजवळ) ते पुलाच्या शेवटपर्यंत (कुडतरी डाऊन रॅम्पजवळ) जाणारी एक लेन तात्पुरती बंद राहील. यासाठी पर्यायी मार्ग म्हणून मडगावहून पणजीकडे येणारी वाहने शरयू टोयोटा शोरूम ते सेंट्रन्ट स्लोप, कुठ्ठाळी क्रॉस, कुठ्ठाळी सर्कल, अप रॅम्प, कुठ्ठाळीमार्गे वळवली जातील.

प्रवाशांसाठी मार्ग

जुने गोवे ते पणजी : वाहने रायबंदर पाटो - चिंबेल जंक्शन - मेरशी जंक्शन - अटल सेतू - पणजी डाऊन रॅम्पमार्गे वळवली जातील.

पणजी ते रायबंदर : दिवजा सर्कल - केटीसी सर्कल - मळा - सांताक्रूझ - मेरशी - रायबंदर या मार्गे जाता येईल.दाबोळी विमानतळ किंवा मडगावकडे जाणारी वाहने : नवीन झुआरी पुलाच्या बॅरिकेड केलेल्या डावीकडील लेनमधून जाऊन कुडतरी डाऊन रॅम्पमधून बाहेर पडतील.

- डी. बी. मार्गावरील रहिवाशांसाठी : मिरामार रेसिडेन्सी गेट ते हॉटेल मेरियॉट लेनपर्यंत रहिवाशांसाठी एक विशेष लेन उपलब्ध असेल. वाहने मॅरियॉट लेनमधून प्रवेश करून कांपाल येथील स्टारबक्स कॅफे जंक्शनमधून बाहेर पडू शकतात.