पणजी: राज्यातील जमीन हडपप्रकरणी तपास करत असलेल्या विशेष तपास पथकाने (एसआयटी) नोंदणी विभागाकडून वैयक्तिक, संघटना तसेच काही कंपन्या मिळून सुमारे 160 प्रकरणांची विक्री खतांची माहिती मागविली आहे. यामध्ये पथकाने अटक केलेल्या काही संशयितांचा त्या प्रकरणांशी संबंध आहे, अशी माहिती वरिष्‍ठ पोलिस अधिकाऱ्यांनी दिली.

(Land Scam In Goa)

या पथकाकडे सुमारे दोनशेच्या आसपास जमीन हडपप्रकरणीच्या तक्रारी आल्या आहेत. त्यातील सुमारे 30 तक्रारींचा तपास सुरू आहे. अजून एकाही प्रकरणाचा तपास पूर्ण झालेला नाही. जमिनीच्या व्यवहारांचा संबंध मामलेदार व भू-नोंदणी खात्याशी असल्याने सविस्तर माहिती मिळेपर्यंत उशीर होत आहे. त्यासाठी या दस्तावेजची माहिती असलेले अधिकारी मदतकार्यासाठी आहेत.

मात्र, तपासावेळी येणारी नवीन माहिती व त्याचे पुन्हा दस्तावेज मिळविण्यात वेळ जात आहे. ही जमीन हडप प्रकरणाची साखळी बरीच मोठी आहे व या जमीन खरेदीच्या व्यवहारात अनेकजण गुंतलेले असण्याची शक्यता नाकारता येत नाही. संशयितांना वारंवार बोलावून त्यांच्याशी संबंधित असलेल्या प्रकरणांची चौकशी केली जात आहे, अशी माहिती अधिकाऱ्याने दिली.

धार्मिक संघटनांनाही विकल्या जमिनी

जमीन हडपप्रकरणी तपास करताना काही संशयितांना अटक करण्यात आली होती. त्यांनी बनावट दस्तावेजाद्वारे त्यातील काही जमिनी विकासक तसेच काही धार्मिक संघटनांनाही विकल्या असल्याचे समोर आले आहे. त्यामुळे या जमिनीच्या विक्री खताची माहिती घेऊन झालेल्या व्यवहाराचा तपास केला जाणार आहे, असे या अधिकाऱ्याने सांगितले.