पणजी: ड्रग्सविरोधी कक्षाच्या (एएनसी) पथकाने वागातोर व हरमल येथे छापा टाकून एका बडतर्फ कॉन्स्टेबलसह दोन स्थानिकांना अटक करत त्यांच्याकडून १०.९८ लाखांचे ड्रग्स जप्त केले. संशयितांनी या ड्रग्सची विक्री करण्यासाठी वापरलेली वाहनेही जप्त केली आहेत. बडतर्फ पोलिस करण गोवेकर याला ५ दिवसांची पोलिस कोठडी दिल्याची माहिती ड्रग्सविरोधी कक्षाच्या अधिकाऱ्यांनी दिली.

पोलिसांनी दिलेल्या माहितीनुसार, गेल्या काही दिवसांपासून हणजूण येथील बडतर्फ पोलिस कॉन्स्टेबल करण गोवेकर (वय २३ वर्षे) हा ड्रग्स विक्री प्रकरणाशी संबंधित असल्याची माहिती मिळाली होती. त्यानुसार एएनसी पथकाने त्याच्यावर पाळत ठेवली होती. अत्याधुनिक यंत्रणांद्वारे त्याच्या हालचालींवरही नजर ठेवली होती.

तो शनिवारी रात्री वागातोर येथे ग्राहकाला ड्रग्स देण्यासाठी येणार असल्याची माहिती मिळताच या परिसरात सापळा रचण्यात आला. तो गाडीने येत असताना ओझरान येथे एएनसी पथकाने त्याला अडविले. त्याची तसेच गाडीची तपासणी केली असता त्याच्याकडे ३७ ग्रॅम कोकेन, ३७ ग्रॅम मेथाम्फेटामाईन व १५ उच्च दर्जाच्या एक्स्टसी टॅबलेट्स जप्त करण्यात आल्या. आंतरराष्ट्रीय बाजारपेठेत त्याची किंमत सुमारे ८.९८ लाख रुपये आहे.