पणजी: शहरातील स्मार्ट सिटीच्या कामाच्या दर्जावर सोमवारी नाराजी व्यक्त करणाऱ्या महापौर रोहित मोन्सेरात यांनी १ मे रोजी झालेल्या सर्व कामांची पाहणी केली जाणार असल्याचे सांगितले आहे. कारण मे अखेरपर्यंत गटार, रस्ते, पदपथाची कामे होतील, असे पणजी स्मार्ट सिटी विकास लिमिटेडने (आयपीएससीडीएल) यापूर्वीच न्यायालयात प्रतिज्ञापत्र दिले आहे.

स्मार्ट सिटीच्या कामे वेळेत होत नाहीत, अशा नागरिकांच्या तक्रारी आहेत. त्याशिवाय जी कामे सुरू आहेत, त्या कामाच्या दर्जावरही प्रश्न उपस्थित होत आहेत. जी कामे सुरू आहेत, ती योग्य आहेत की नाहीत याचे निरीक्षण ‘आयपीएससीडीएल’च्या अभियंत्यांकडून होत नाही.

कामे पूर्ण करण्याची जी मुदत दिली आहे, त्यामुळे १ मे रोजी झालेल्या कामांची तपासणी केली जाईल. त्याशिवाय महत्त्वाचे म्हणजे १८ जून मार्गाचे काम बाकी आहे, त्या मार्गाखालूनच पावसाचे पाणी वाहून जाते. त्यामुळे गटारांची जोडणीची कामे झालेली नाहीत.

त्याशिवाय या रस्त्याचे काम बाकी असल्याने काय समस्या उद्‍भवू शकतात, हेही तपासले जाईल. १८ जून रस्त्याचे काम न होण्यामागे नियोजनाचा अभाव असल्याचे दिसते, असे महापौर यांनी सांगितले. पोलिस मुख्यालयासमोरील रस्ता डांबरीकरणाचे काम झालेले नाही, हे लक्षात आणून देताच १५ दिवसांत डांबरीकरणाची निविदा काढली जाईल, असे महापौर म्हणाले.