वास्को: भारतीय नौदलाची पाणबुडी आणि मासेमारी नौकेच्या अपघातात बेपत्ता झालेल्या दोन मच्छिमारांचा मृत्यू झाला असून, तब्बल आठ दिवसांनंतर त्यांचा मृतदेह आढळून आला आहे. भारतीय नौदल आणि ओएनजीसी यांच्या संयुक्त ऑपरेशनमध्ये २८ नोव्हेंबर रोजी मृतदेह शोधण्यात यश आले. २१ नोव्हेंबर रोजी मार्थोमा मासेमारी बोटीसोबत झालेल्या अपघातात दोन मच्छिमार बेपत्ता झाले होते.

भारतीय नौदलाची पाणबुडी आणि मासेमारी बोट 'मार्थोमा' यांचा 21 नोव्हेंबर 2024 रोजी संध्याकाळी गोव्याच्या उत्तर-पश्चिमेस सुमारे 70 नॉटिकल मैलांवर अपघात झाला. मासेमारी बोटीत यावेळी १३ मच्छिमार होते. अपघातानंतर ११ मच्छिमारांना वाचविण्यात यश मात्र दोन मच्छिमार बेपत्ता होते. बेपत्ता मच्छिमारांचा शोध घेण्यासाठी नौदलाने सर्च ऑपरेशन सुरु केले होते.

नौदलाच्या पाणबुडीने धडक दिल्याने मार्थोमा मासेमारी बोट बुडाली होती. बेपत्ता दोघांचा शोध घेण्यासाठी नौदलाने तटरक्षदल आणि मुंबईतील युनिटची देखील मदत घेतली होती. चॉपरच्या मदतीने देखील बेपत्ता मच्छिमारांचा शोध घेण्यात आला. अखेर ओएनजीसीच्या मदतीने बेपत्ता दोघांचा मृतदेह शोधण्यात यश आले आहे

कसा झाला अपघात?

मार्थोमा बोट मासेमारीसाठी समुद्रात असताना भारतीय नौदलाची पाणबुडी अचानक वर आली त्याचच बोट उलटी झाली व हा अपघात झाला, असा दावा केला जात आहे. अपघात झाला त्यावेळी बोटीवर १३ व्यक्ती होते दरम्यान तात्काळ सुरु केलेल्या बचाव मोहिमेत ११ जणांना वाचविण्यात यश आले. तर, दोघेजण बेपत्ता झाले होते.