वास्को: वरुणापुरी-मांगोरहिल येथील एका वसाहतीतील नागरिकांना आपल्या जागेतून रस्ता देण्यासाठी नौदलाने संमती दर्शविल्याने कदाचित पुढील महिन्यापासून या रस्त्याचे काम सुरू होण्याची शक्यता आहे. सदर प्रश्न गेले तीस पस्तीस वर्षे भिजत पडला होता.

तथापी वास्कोचे आमदार कृष्णा साळकर यांनी याप्रकरणी पाठपुरावा करून शेवटी सुवर्णमध्य काढला. त्यामुळे तेथील रहिवाशांनी समाधान व्यक्त केले. साळकर यांचे आभार मानले. नौदलाच्या जागेतून काहीजणांच्या घरांकडे व इमारतीकडे जाणारी वाट होती.

ती वाट नौदलाने बंद केल्याने तेथील रहिवाशी गेली तीस पस्तीस वर्षे रस्त्यासाठी झगडत होते. याप्रकरणी तोडगा काढण्याचा प्रयत्न झाला होता. परंतु यश आले नाही. त्यामुळे वाद संपुष्टात आला नव्हता. आमदार साळकर यांनी याप्रकरणी योग्य तोडगा काढण्याचे आश्वासन दिले होते.

त्यानुसार त्यांनी नौदलाच्या अधिकाऱ्यांसमवेत चर्चा केली. बऱ्याच चर्चेअंती शेवटी नौदल तेथून रस्ता देण्यासाठी सामंजस्य करारावर स्वाक्षऱ्या करण्यास तयार झाले. लवकरात लवकर रस्त्याचे काम सुरू व्हावे, यासाठी मुख्यमंत्र्यांची भेट घेणार असल्याचे आमदार दाजी साळकर यांनी स्पष्ट केले.

नौदलाकडून रहिवाशांना अटी

याप्रकरणी दक्षिण गोवा जिल्हाधिकारी कार्यालयात बैठक झाली. याप्रसंगी दोन्ही बाजूचे प्रतिनिधी उपस्थित होते. त्यांनी सामंजस्य करारावर सह्या केल्या. तेथे रस्त्यासाठी परवानगी देण्यास नौदलाने सहमती दर्शविली. तथापि सुरक्षेच्या द्दष्टीने काही अटी घातल्या आहेत. त्याचा स्वीकार तेथील रहिवाशांनी केला आहे. तेथे नौदलाच्या कुंपणालगत कोणीही आपली वाहने उभी करू नयेत, यासाठी सर्वजण राजी झाले आहेत.