Indian Navy Aircraft's Emergency Landing

भारतीय नौदलाच्या विमानाचे शुक्रवारी (दि. 17 मे) दुपारी दाबोळी विमानतळावर आपत्कालीन लँडिंग करण्यात आले. यामुळे सुमारे पावणे दोन तास धावपट्टी बंद ठेवण्यात आली होती. तसेच, काही फ्लाईट्सचे ऑपरेशन देखील यामुळे प्रभावित झाले.

दाबोळी गोवा विमानतळाचे संचालक एसव्हीटी धनंजय राव यांनी पीटीआय या वृत्तसंस्थेला दिलेल्या माहितीनुसार, भारतीय नौदलाच्या विमानाचे आपत्कालीन लँडिंग झाल्यानंतर शुक्रवारी दुपारी 4.50 ते 6.30 वाजेपर्यंत धावपट्टी बंद ठेवण्यात आली होती.

या कालावधीत नागरी उड्डाणांसाठी धावपट्टी उपलब्ध नसल्यामुळे चार उड्डाणे इतरत्र वळवण्यात आल्याचे त्यांनी सांगितले.

राव यांनी दिलेल्या माहितीनुसार, तीन उड्डाणे उत्तर गोव्यातील मोपा येथील मनोहर आंतरराष्ट्रीय विमानतळावर वळवण्यात आली, तर दुसरे विमान मुंबईकडे वळवण्यात आले.

दरम्यान, आता दाबोळी विमानतळावरील कामकाज सामान्यपणे सुरू झाले असल्याची माहिती राव यांनी दिली.