पिसुर्ले : पर्ये मतदार संघात येणाऱ्या भिंरोडा पंचायत क्षेत्रात येणाऱ्या विविध भागातील नागरिकांना तसेच शालेय विद्यार्थ्यांना बस वाहतूकीची व्यवस्था नसल्याने गंभीर समस्येला तोंड द्यावे लागत आहे. त्यामुळे विद्यार्थी तसेच नोकरदार वर्गाचा खोळंबा होत असून अनियमित बस वाहतूकीमुळे या भागातील नागरिक त्रस्त झाले आहेत. या प्रकरणी सरकारने तोडगा न काढल्यास विद्यार्थ्यांना शाळेत न पाठवता रस्ता रोको केला जाईल असा इशारा दिला आहे.

या संबंधी सविस्तर वृत्त असे की गेल्या काही दिवसांपासून या भागातून ये-जा करणाऱ्या कदंबा बसेस बंद झाल्या आहेत, त्यामुळे साखळी, (sanquelim) वाळपई तसेच इतर भागांत शिक्षणासाठी जाणाऱ्या विद्यार्थ्यांसमोर (Student) फार मोठी अडचण निर्माण झाली आहे. त्याच प्रमाणे बाजारहाट करण्यासाठी जाणाऱ्या नागरिकांना तसेच नोकरी साठी जाणाऱ्या नोकरीदार वर्गाला याचा फटका बसत आहेत. या भागात बस व्यवस्था नसल्याने कधी कधी विद्यार्थी शाळेत वेळेवर पोहचत नाहीत, तर काही वेळा पालकांना आपला कामधंदा सोडून मुलांना शाळेत ने आण करण्याकरिता जावे लागत आहे.

या भागातील वाहतूक (Transportation) व्यवस्था सुरळीत करावी अशी मागणी बऱ्याच वेळा करून सुद्धा सरकार या प्रकरणी कोणताच तोडगा काढत नाही, त्यामुळे पालक संताप व्यक्त करत आहेत. त्याच बरोबर या भागातील काही मार्गांवर खाजगी बसेस सुरू केल्या होत्या, परंतू त्या बसने वाहतूक खात्याकडून मार्ग घेतले आहेत, पण गावातून ये जा न करता अर्ध्या मार्गातून वाहतूक करतात, याची चौकशी वाहतूक खात्याने करावी. त्याच प्रमाणे या भागातील वाहतूक समस्येची दखल घेऊन तातडीने हा विषय संपुष्टात आणावा. अन्यथा विद्यार्थ्यांना घेऊन रास्ता रोको करण्याचा पर्याय निवडावा लागेल असा इशारा भिरोंडा पंचायतीचे माजी सरपंच तथा विद्यमान पंच उदयसिंह राणे यांनी दिला आहे.

दरम्यान, या भागातील वाहतूक व्यवस्था सुरळीत केल्यास याचा फायदा शिंगणे, वाघुरे, पणसे, पिसुर्ले या ठिकाणाचा नागरिकांना तसेच विद्यार्थ्यांना होणार आहे, त्यामुळे हा विषय त्वरित मार्गी लावण्याची अत्यंत गरज आहे.