कुडका येथील उतरणीवर खासगी जमिनीतील वृक्ष जेसीबीच्या साहाय्याने उपटून काढण्याचा प्रकार घडला असून येथील शेतकरी संतप्त झाले आहेत. आश्चर्याची गोष्टी म्हणजे, ही वृक्षतोड कुडका-बांबोळी-तळावली पंचायतीनेच केली आहे.

मुख्य जिल्हा रस्त्यांच्या बाजूला असलेल्या झाडांच्या फांद्या कापण्याच्या नावाखाली हा बेकायदेशीर प्रकार घडला असल्याचा आरोप शेतकरी मंगेश कुर्टीकर यांनी केला आहे. कुडका-मेरशी मुख्य जिल्हा रस्ता असून येथील झाडेझुडपे आणि वाहतुकीस अडथळा ठरणाऱ्या झाडांच्या फांद्या कापण्याचे काम सार्वजनिक बांधकाम खात्याद्वारे केले जाते; परंतु येथे पंचायतीला अधिकार नसतानाही हा बेकायदेशीर प्रकार केला असल्याचा दावा कुर्टीकर यांनी केला आहे.

हा वृक्ष मुळासकट उपटून काढण्यात आला. त्यासाठी चक्क जेसीबीचा वापर करण्यात आला. आमच्या खासगी जमिनीत शिरून मोडतोड करण्यात आली. यामुळे आमचे सुमारे १.५ लाख रुपयांचे नुकसान झाले असून संबंधित जेसीबीमालक आणि पंचायतीच्या विरोधात गुन्हा नोंदवण्याची मागणी केली आहे, तसेच याप्रकरणी वन खाते आणि तिसवाडी मामलेदारांकडे तक्रार नोंदवणार असल्याची माहिती मंगेश कुर्टीकर यांनी दिली.

संबंधितांवर गुन्हा नोंदविणार

कुडका येथे बेकायदा वृक्षतोड केल्याची तक्रार मंगेश कुर्टीकर यांनी केली आहे.आम्ही येथे डोंगरावर काजू-भाजीपाल्याची लागवड केली आहे. वास्तविक आमची परवानगी न घेता हे काम करण्यात आले. हे काम करण्यामागे त्यांचा उद्देश काय होता, याचा जाब पंचायतीला विचार आहोत. यासंबंधी आगशी पोलिस निरीक्षकांना निवेदन देऊन बेकायदेशीररित्या वृक्षतोड केल्याचे नमूद केले आहे, असे कुर्टीकर यांनी सांगितले.