पणजी: दोना पावला येथील रस्त्यावर संध्याकाळच्या वेळी चालत जाणाऱ्या तरुणीचा विनयभंग केल्याप्रकरणी पणजी पोलिसांनी तेथील सीसी टीव्ही कॅमेऱ्याच्या मदतीने रेल्वेने पसार होण्याच्या तयारी असताना कॅसिनोचा कर्मचारी संशयित अमरित बल्ला (२४, झारखंड) याला अटक केली. त्याला न्यायालयाने एक दिवसांची पोलिस कोठडी दिली आहे, अशी माहिती पोलिस निरीक्षक विजय चोडणकर यांनी दिली.

पोलिसांनी दिलेल्या माहितीनुसार, दोना पावला येथील ‘हवाई बीच’ येथे राहत असलेली तरुणी काही दिवसांपूर्वी संध्याकाळच्यावेळी रस्त्यावरून चालत होती. त्यावेळी समोरून आलेल्या अनोळखी तरुणाने तिला घट्ट पकडले. तिने आरडाओरड केली असता तो तरुण तेथून पळाला. या घटनेची तक्रार तरुणीने पणजी पोलिसांत दिली होती.

पोलिसांनी घटनेच्या ठिकाणी जाऊन येथील सीसी टीव्ही कॅमेऱ्यामध्ये त्या अनोळखी तरुणाची माहिती मिळवून ओळख पटवण्यासाठी त्या भागातील काही आस्थापनांमध्ये तसेच आजुबाजूला सुरू केलेल्या बांधकामाच्या ठिकाणी चौकशी केली. अखेर या अनोखळी तरुणाची ओळख पटली. तो दोना पावला येथील प्रसिद्ध कॅसिनोमध्ये कर्मचारी होता व तो तेथेच राहत होता.

चौकशीनंतर पलायनाचा डाव उघड

पोलिसांनी हॉटेलातील कॅसिनोमध्ये कामाला असलेल्या व संशयित अमरित बल्ला याच्यासोबत राहत असलेल्या कर्मचाऱ्यांची कसून चौकशी केली असता तो मडगाव येथून रेल्वेने झारखंड येथे जाण्यास निघाला असल्याची माहिती मिळताच पणजी पोलिस पथक मडगावला रवाना झाले. तो झारखंडला जाणाऱ्या रेल्वेसाठी प्लॅटफॉर्मवर थांबला असता पोलिसांनी त्याला ताब्यात घेतले. त्याला अटक करून पोलिस तपास करत आहेत. त्याची दंडाधिकाऱ्यांच्या उपस्थितीत पीडित तरुणीमार्फत ओळखपरेड करण्यात येणार असल्याचे पोलिसांनी सांगितले.