Vijay Sethupathi At IFFI Goa 2023: 'मेथड अ‍ॅक्टिंग काय असते मला माहित नाही, मी आशय समजून घेतो, दिग्दर्शक, लेखकाला काय सांगायचे आहे, याची माहिती घेतो आणि भूमिका साकारतो, असे दक्षिणेतील सुपरस्टार विजय सेतुपतीने उत्तर दिले.

इफ्फीत आयोजित 'इन- कन्व्हर्सेशन' या संवाद सत्रात अभिनेता विजय सेतुपती बोलत होता. अभिनेत्री खुशबू सुंदरने विजयची मुलाखत घेतली. 'लिव्हिंग द कॅरेक्टर' या विषयावर विजयने मतं मांडले.

भूमिकांसाठी तयारी करताना चित्रपट क्षेत्रातील दिग्गजांबरोबर चर्चा आणि संवादातून मी शिकत गेलो. मेथड अ‍ॅक्टिंग काय असते मला माहित नाही, मी आशय समजून घेतो. अभिनयाचे कोणतेही वेगळे सूत्र नाही. कलाकारांनी व्यक्तिरेखा पूर्णपणे जगण्याची गरज असते, असे मत विजय सेतुपती यांनी मांडले.

राष्ट्रीय पुरस्कार मिळवून दिलेल्या सुपर डिलक्स या चित्रपटातील ट्रान्सजेंडरच्या व्यक्तिरेखेबाबत सेतुपती यांना प्रश्न विचारण्यात आला. ट्रान्सजेंडर व्यक्तींना सामोरे जावे लागत असलेल्या जीवनातील संघर्षांचे चित्रण या चित्रपटात करण्याचा प्रयत्न केल्याचे सेतुपती म्हणाले.

खलनायकाच्या भूमिकेच्या निवडीबद्दल विचारले असता सेतुपती यांनी विशिष्ट भूमिकांपुरते मर्यादित न राहता, पटकथेच्या आधारे विविध भूमिका करण्याचे स्वातंत्र्य असायला हवे, असे उत्तर दिले.