फोंडा: एखाद्या औद्योगिक प्रकल्पात काम करताना कर्मचाऱ्यांच्या सुरक्षेचा विषय हा महत्त्वाचा ठरतो. उत्पादन क्षेत्रात कार्यरत असलेल्या कर्मचाऱ्यांना चुकून घडणाऱ्या अपघातावेळी प्राथमिक उपचार वेळेत पोचणे आवश्‍यक असल्याने सरकारने त्यादृष्टीने कार्यवाही करताना प्रथमोपचारासंबंधी प्राथमिक माहिती असावी यासाठी प्रशिक्षण सुरू केले असल्याचे केंद्रीय खाण निरीक्षक डॉ. कौशिक सरकार यांनी सांगितले.

फोंड्यात इंडियन मेडिकल असोसिएशन फोंडा शाखेच्या सहकार्याने डॉ. धायमोडकर आयएमए प्रथमोपचार प्रशिक्षण अकादमी सुरू करण्यात आली आहे. या अकादमीचे उद्‍घाटन डॉ. कौशिक सरकार यांच्या हस्ते तसेच इतर मान्यवरांच्या उपस्थितीत काल करण्यात आले. फोंड्यातील आयएमए सभागृह तसेच मिनिनो ट्रेड सेंटर सभागृहात हा कार्यक्रम झाला. संपूर्ण राज्यातील ही पहिलीच प्रथमोपचार प्रशिक्षण अकादमी ठरली आहे.

या कार्यक्रमाला डॉ. रुफीन मोंतेरो, डॉ. संतोष उसगावकर, डॉ. जगदीश काकोडकर, डॉ. ॲरन सुवारिस व डॉ. वल्लभ धायमोडकर उपस्थित होते. डॉ. वल्लभ धायमोडकर यांनी आपले विचार व्यक्त केले, तर डॉ. राजीव उसगावकर यांनी सूत्रसंचालन करून आभार मानले.