पणजी: ज्या भागात गेली 20 वर्षे खनिज उत्खनन झाले नाही. तेथील खनिज मालाची वाहतूक पिसुर्लेतून केली जात आहे, असा दावा करणारी जनहित याचिका गोवा फाऊंडेशनने सादर केली आहे. ही याचिका आज मुंबई उच्च न्यायालयाच्या गोवा खंडपीठ याच्यासमोर नोंदवण्यात आली असता त्यावरील सुनावणी येत्या 12 एप्रिलला ठेवण्यात आली आहे.

पिसुर्ले गावातून मोठ्या प्रमाणात खनिजवाहू ट्रक वाहतूक करत आहेत. या वाहतुकीमुळे तेथे होणारे धूळ प्रदूषण तसेच असलेला धोका हे गृहित धरून पिसुर्लेच्या लोकांनी आंदोलन केले होते.

या वाहतुकीसाठी खाण कंपन्यांनी परवानगी घेतलेली नाही असा दावा ग्रामस्थांनी करून वाहतूक रोखली होती. त्यावेळी डिचोलीचे उपजिल्हाधिकारी व डिचोली पोलिस निरीक्षक यांनी खनिजवाहू ट्रकांना पोलिस संरक्षण देत वाहतूक पुन्हा सुरू केली होती. यावेळी झालेल्या आंदोलनावेळी काही ग्रामस्थांना ताब्यात घेण्यात आले होते. गावातून वाहतुकीला परवाना नसताना ती कशी केली जाते असा प्रश्‍न उपस्थित करण्यात आला होता.

दरम्यान, या बेकायदा खनिजवाहू प्रकरणी गोवा फाऊंडेशनने जनहित याचिका सादर केली आहे. ज्या भागातून हा खनिज माल उचलून तो वाहतूक केला जात आहे तेथे गेल्या 20 वर्षात खनिज उत्खनन झालेलेच नाही. ही खनिजवाहू सर्वोच्च न्यायालयाने दिलेल्या आदेशाचे उल्लंघन करून करण्यात येत असल्याने त्याची चौकशी करण्याचे निर्देश द्यावेत, अशी विनंती याचिकादाराने केली आहे.