Vasco Illegal Handcart Vendors

वास्को: विनापरवाना हातगाडेवाल्यांनी रस्त्यांवर अतिक्रमणे केल्याने वाहतुकीला अडथळा निर्माण होऊ लागला आहे. मुरगाव पालिका कार्यालय इमारतीपासून अवघ्या काही पावलांवर हे हातगाडे उभे केले जातात. या विक्रेत्यांविरोधात कारवाई करण्याकडे पालिका अधिकारी दुर्लक्ष करीत असल्याच्या प्रतिक्रिया नागरिकांमधून व्यक्त होत आहेत. मुरगाव पालिकेने विनापरवाना हातगाडेवाल्यांविरोधात कारवाई करावी, अशी मागणी होत आहे.

येथे विनापरवाना हातगाडेवाल्यांची संख्या दिवसेंदिवस वाढत आहे. ते शहरात निरनिराळ्या ठिकाणी हातगाडे लावून साहित्याची विक्री करतात. यापूर्वी मुरगाव पालिकेने विनापरवाना हातगाडे जप्त करण्याची मोहीम सुरू करून परवाना नसलेले हातगाडे जप्त केल्याने रस्ते मोकळे झाले होते.

संबंधितांची मुजोरी वाढली

कुन्हा चौकात हातगाड्यांनी त्यांना आखून दिलेल्या जागा सोडून रस्त्यावरच आक्रमण केले आहे. ते हातगाडेवाले कोणाला जुमानत नाहीत. याप्रकरणी पालिका निरीक्षक, अधिकारी कोणतीही कारवाई करीत नाहीत. त्यामुळे तेथे वाहनांना मोठा अडथळा होत आहे. त्यांच्याविरोधात कारवाई न करण्यामागे कोणते अर्थकारण आहे ते समजण्यास मार्ग नाही. काहीवेळा हे हातगाडेवाले आपली जागा सोडून पूर्वीच्या सिने वास्को चौकात हातगाडे उभे करतात.