सासष्टी: आके बायश पंचायतीने आज आपल्या क्षेत्रातील बेकायदेशीर गाडे पाडण्याचे काम केले. शुक्रवारी (२७ डिसेंबर) सकाळी बुलडोझरद्वारे तीन गाडे जमिनदोस्त करण्यात आले. हे गाडे वाहतुकीला अडथळा ठरत होते. त्याचप्रमाणे यापूर्वी पंचायत क्षेत्रातील सर्व बेकायदेशीर गाडेवाल्यांना नोटीसाही पाठविल्या होत्या.

यासंदर्भात सरपंच इनासियो ऊर्फ डॅनी डायस यांने सांगितले, की आम्ही त्यांना गाडे हटविण्यासाठी विनंती केली होती. कित्येकांनी आपले गाडे यापूर्वीच हटविले होते. आम्ही कुणालाही नाहक त्रास देणार नाही, पण या गाड्यांचा खरोखरच सर्वांनाच त्रास होत होता.

स्थानिक पंच अमिशा तिळवे यांनी सांगितले, की आमच्याकडे या गाड्यांबद्दल अनेक तक्रारी आल्या होत्या. त्यांची या परिसरात दादागिरीही वाढली होती. ही दादागिरी आणखी वाढू नये व लोकांना त्रास होऊ नये म्हणून ही कारवाई करावी लागली.