कळंगुट: खोब्रावाडा-कळंगुट येथे भाटकाराच्या जमिनीत बेकायदा उभारलेल्या तीन पक्क्या खोल्या बुधवारी दुपारी पंचायत मंडळाने पोलिस बंदोबस्तात जमीनदोस्त केल्या. यावेळी बार्देश तालुक्याचे मामलेदार, गटविकास अधिकारी तसेच स्थानिक पंचायत मंडळाचे सदस्य उपस्थित होते.

या जमिनीचे मालक इजिदिओ यांनी आपल्या जमिनीत दिवकर नामक इसमाने जबरदस्तीने बेकायदा खोल्या उभारल्याची तक्रार कळंगुट पंचायत कार्यालयात केली होती. या खोल्यांमध्ये परप्रांतीय मजूर वास्तव्यास होते. न्यायालय तसेच म्हापसा उपविभागीय दंडाधिकाऱ्यांच्या कार्यालयात यावर युक्तिवाद झाल्यानंतर हे बेकायदा बांधकाम (खोल्या) तात्काळ पाडण्याचे आदेश स्थानिक पंचायतीला न्यायालयाने दिले. त्यानुसार ही कारवाई केल्याचे पंचायत सचिव अर्जुन वेळीप यांनी सांगितले.

दुसरीकडे, वास्को शहरात तसेच इतर भागात बेकायदेशीर बांधकामांना ऊत आला असून संबंधितांचे यावर नियंत्रण नसल्यानेच अशा कामांना ऊत येतो. यानंतर कोणी एकाने बेकायदेशीर कामाविषयी आवाज उठविला की मग धावपळ सुरु होते व कारवाईची गदा येते हे नक्की. असाच प्रकार ओरुले वास्को येथे घडला आहे. जितेंद्र बोरकर यांनी केलेल्या बेकायदा बांधकामावर न्यायालयाच्या आदेशानुसार पालिकेतर्फे कारवाई करण्यात आली.

गेल्या दिड वर्षांपासून हे प्रकरण न्यायालयीन होते. येथील जागेत रस्त्याच्या शेजारी अतिक्रमण करून संरक्षक भिंत बांधून जितेंद्र बोरकर यांनी जागा बळकावली होती. याविषयी पालिकेत तक्रार दाखल करण्यात आली होती. शेवटी प्रकरण उच्च न्यायालयात गेले असता जितेंद्र बोरकर यांनी केलेले बेकायदेशीर बांधकाम उच्च न्यायालयाच्या आदेशानुसार कारवाई करून आज पाडण्यात आले.