Anjuna Illegal Construction : गोवा किनारी क्षेत्र व्यवस्थापन प्राधिकरणाने स्थानिक पंचायतीसह हणजूण पंचायत क्षेत्रातील नॉन डेव्हलपमेंट झोनमधील नऊ बेकायदेशीर बांधकामे पाडण्याचे काम हाती घेतले. बुधवारपासून ती पाडण्याची मोहीम हाती घेण्यात आली आहे.

उपलब्ध माहितीनुसार, हणजूण पंचायत क्षेत्रात सुमारे ३८ बांधकामे आहेत. जी सीआरझेड नियमांचे उल्लंघन करतात. यावेळी मजूर आणि जेसीबी मशिनच्या साहाय्याने ही बांधकामे पाडण्यात येत आहेत.सीआरझेडच्या निकषांचे उल्लंघन करून बांधलेल्या पाच बांधकामांवर डेमोलिशन पथकाने गुरुवारी (ता. ११) हातोडा फिरवला, तर बुधवारी चार बांधकामे पाडण्यात आली आणि एकाला न्यायालयाकडून स्थगिती मिळविली.

हणजूण पंचायतीचे सरपंच लक्ष्मीकांत चिमुलकर यांच्याशी संपर्क साधला असता त्यांनी सांगितले की, गोवा किनारी क्षेत्र व्यवस्थापन प्राधिकरणासह सीआरझेडच्या नियमांचे उल्लंघन करणारी बेकायदा बांधकामे पाडण्याचे काम केले जात आहे.

दरम्यान, उच्च न्यायालयाच्या आदेशानंतर पाहणी करण्यात आली. ज्यामध्ये बेकायदेशीर बांधकामे ओळखण्यात आली. त्याचप्रमाणे बेकायदा बांधकाम करणाऱ्यांना पंचायतीने कारणे दाखवा नोटीस बजावली होती.