Patnem Illegal Construction: कोळंब, पाटणे येथे स्थानिकांची पारंपरिक वाट (रस्ता) अडविलेली असून याठिकाणी माडांची व झाडांची कत्तल करून बेकायदेशीरपणे बांधकाम करण्यात येत आहे. याविरुद्ध ७ दिवसांत कारवाई करा. अन्यथा आपण खुद्द स्थानिकांसह हा रस्ता मोकळा करू,असा इशारा स्थानिक नगरसेवक शुभम कोमरपंत यांनी काल घटनास्थळी पत्रकारांशी बोलताना दिला.

यावेळी पालिका अभियंता व १०० च्या आसपास स्थानिक नागरिक उपस्थित होते. पालिका अभियंत्याने यावेळी सदर जागेचे निरीक्षण करून बांधकामाचे मोजमाप करून नोंद करून घेतली.

नगरसेवक कोमरपंत पुढे म्हणाले की, आपण यासंबंधीचे एक निवेदन काणकोण पालिका, उपजिल्हाधिकारी कार्यालय, यांना सादर करून कारवाईची मागणी केली आहे. याठिकाणी जोरदार पाऊस सुरू असताना प्लास्टिकचे कुंपण उभारले, लोकांना त्रास करून याठिकाणी व्यवसाय आम्ही करू देणार नाही. डांबरीकरण केलेल्या रस्त्यावर मातीचा भराव घातला.७ शॅक कुटीरे बांधून पूर्ण केली, नाव ठेवण्याच्या जागेवर अतिक्रमण केलेले आहे.

दीपक पागी म्हणाले की, याठिकाणी ‘सीआरझेड’ सीमांकनाचा दगड गायब करण्यात आला आहे. अनेक माड व आकेशिया झाडांची कत्तल करण्यात आली आहे.

माजी उपनगराध्यक्ष गुरू कोमरपंत म्हणाले की याचा उपयोग समाज बांधव मच्छीमार जाळे व अन्य कामांकरता करीत‌. ही शेकडो वर्षांपूर्वीची महत्वाची पायवाट असल्याने २५ वर्षापूर्वी तत्कालीन नगरसेवक तुबकी यानी डांबरीकरण करून हा रस्ता केला. हा सुरक्षित रस्ता असून स्थानिक याचाच उपयोग करीत असत.नावांची याच रस्त्याने दुरुस्तीसाठी ने-आण सगळे बांधव करीत आले आहेत. त्यामुळे आमचा रस्ता जमीन मालकाने त्वरित मोकळा करावा, अशी आमची मागणी आहे.

आपण कुणाचीच वाट अडवली नाही!

दरम्यान, जमीन मालकाने स्वत: पत्रकारांना संपर्क करून सांगितले की आपण कुणाचीच वाट किंवा रस्ता अडविलेला नाही. कसलेच बांधकाम बेकायदेशीर केलेले नाही. झाडे तोडलेली नाहीत. जे काम केले आहे ‘सीआरझेड’शी परवानगी घेऊन केलेले आहे. ते योग्य कायदेशीरपणे केलेले असून आपल्याकडे सर्व आवश्यक कागदपत्रे आहेत. नाहक आपल्यावर बिनबुडाचे आरोप करण्यात येत आहेत. आपल्याला आज स्थानिक याठिकाणी येणार याची पूर्वकल्पना दिली असती तर मी स्वतः आलो असतो. आपल्या जमिनीत बेकायदेशीरपणे प्रवेश केला म्हणून कायदेशीर कारवाई करू शकलो असतो मात्र आपल्याला ते नको आहे, असेही ते शेवटी म्हणाले.