डिचोली: गोव्यातून कर्नाटकात बेकायदेशीरपणे गुरांची वाहतूक करणारी पाच वाहने दोडामार्ग (महाराष्ट्र) पोलिसांनी ताब्यात घेतली आहेत. या वाहनांमधून जर्सी मिळून पंधरा गायी होत्या. या गायीसह पाचही वाहनचालकांना दोडामार्ग पोलिसांनी ताब्यात घेतले आहे.

शनिवारी सायंकाळी ही कारवाई करण्यात आली. मिळालेल्या माहितीनुसार ही गुरे कर्नाटकमधील बेळगाव येथे नेण्यात येत होती. या गायी कत्तलखान्यात नेण्यात येत होती. असे समजते.

महाराष्ट्र सीमेवर दोडामार्ग येथे पाळत ठेवून असलेल्या बजरंग दलाच्या कार्यकर्त्यांनी संशयावरून अडवली असता, कर्नाटक राज्यात नोंदणी झालेल्या मिनी टेम्पो मिळून पाचही वाहनात गुरे असल्याचे आढळून आले. ही गुरे शेतकऱ्यांना विकण्यासाठी नेण्यात येत होती, असे वाहनचालकांनी बजरंग दलाच्या कार्यकर्त्यांना सांगितले.

मात्र त्यांच्याकडे कायदेशीर परवाना किंवा अन्य कोणतीही कागदपत्रे उपलब्ध नव्हती. नंतर ही वाहने अडवून दोडामार्ग-महाराष्ट्र पोलिसांना कळविण्यात आले. बजरंग दलाचे दोडामार्ग विभागाचे संयोजक नीळकंठ फाटक यांच्या नेतृत्वाखाली बजरंग कार्यकर्त्यांनी ही कारवाई केली.

कत्तलीसाठी वाहतूक

या प्रकाराची माहिती मिळताच दोडामार्ग पोलिसांनी घटनास्थळी येऊन कारवाई सुरू केली. गायीसह पाचही वाहने जप्त करून वाहनचालकांना ताब्यात घेतले. याप्रकरणी महाराष्ट्र पोलिसांनी पंचनामा करून जप्त केलेल्या गुरांची गोशाळेत रवानगी केली आहे. ही गुरे कर्नाटकात कत्तलीसाठी नेण्यात येतात, असा गौप्यस्फोट बजरंग दलाचे दोडामार्ग विभागाचे संयोजक नीळकंठ फाटक यांनी केला.