साखळी: गोव्यात गेल्या काही दिवसांपासून आंतराष्ट्रीय चित्रपट महोत्सवाची बरीच चर्चा सुरु आहे. बुधवारी पणजीतील शामाप्रसाद मुखर्जी मैदानावर आंतराष्ट्रीय चित्रपट महोत्सवाचे उद्घाटन झाले आणि यानंतर आता गुरुवारी (दि. २१ नोव्हेंबर) रोजी आंतरराष्ट्रीय चित्रपट महोत्सवाच्या अनुषंगाने साखळीत साकारण्यात आलेल्या बलून टँट थिएटरचे पद्मिनी फाऊंडेशनच्या अध्यक्षा सुलक्षणा सावंत यांच्या हस्ते उद्घाटन करण्यात आले.

"बलून टँट थिएटरचे उद्घाटन करताना गोव्यात चित्रपट संस्कृती रूजत असताना युवा पिढीने व विद्यार्थ्यांनी चित्रपट लेखन, दिग्दर्शन या कलेत पुढे यावे. या क्षेत्रात आता मोठे भविष्य घडणार आहे.

डिचोली तालुक्यातील दोन युवा कलाकारांनी फिल्म क्षेत्रात मोठे यश देखील मिळविले आहे आणि याचीच प्रेरणा घेत गोमंतकीय युवांनीही या क्षेत्रात उतरावे" असे सुलक्षणा सावंत म्हणाल्या.

साखळीत सुरु झालेल्या या अनोख्या थिएटरचे निर्माण साखळीतील सरकारी महाविद्यालयाच्या मैदानावर करण्यात आले आहे आणि फिल्म फेस्टिव्हलच्या संपूर्ण काळात म्हणजेच २८ नोव्हेंबर पर्यंत साखळीत देखील विविध चित्रपट दाखवले जाणार आहेत. या थिएटरची एकूण क्षमता १२० असून कोणताही चित्रपटप्रेमी विनामूल्य इथे चित्रपटांचा आनंद घेऊ शकतो. सकाळी ९ ते रात्री ९ अशी वेळ या कार्यक्रमासाठी निश्चित करण्यात आली आहे.