मडगाव : आगामी विधानसभा निवडणुकीत गोव्यात तृणमूल काँग्रेस राष्ट्रवादी काँग्रेस पक्षाशी युती करण्याची शक्यता तृणमूलचे नेते चर्चिल आलेमाव (Churchill Alemao) यांनी व्यक्त केली आहे. तसे झाल्यास राष्ट्रवादीला चार जागा सोडण्यात येतील असे त्यांनी सांगितले आहे.

राष्ट्रवादीचे (NCP) प्रदेश अध्यक्ष जुझे फिलिप डिसोझा आपल्याकडे बोलले आहेत. मात्र ही बोलणी प्राथमिक अवस्थेत असल्याचे ते म्हणाले. युती झाल्यास दाबोळीची जागा डिसोझा यांना सोडण्यात येणार असल्याचे त्यांनी सांगितले.

दरम्यान, ओल्ड गोवा येथील बेकायदेशीर बांधकाम तोडणार असे सांगून तीन महिने झाले तरी त्यावर अजून कारवाई झालेली नाही. याबद्दल आलेमाव यांनी तीव्र नाराजी व्यक्त केली. मुख्यमंत्री प्रमोद सावंत यांनी हे बांधकाम पाडणार असे आश्वासन दिले होते. मुख्यमंत्र्यांनी (CM) आपला शब्द पाळावा अन्यथा लोक त्यांना निवडणुकीत (elections) धडा शिकवतील. हे बांधकाम मोडले नाही तर भाजपचे पाच उमेदवार निवडून येणेही कठीण असे ते म्हणाले.

गोव्यात (goa) बजरंग दलाचे कार्यकर्ते पुन्हा आपले डोके वर काढत आहेत. गोव्यात ते धार्मिक कलह माजवू पहात आहेत. निवडणुकीच्या पार्श्वभूमीवर सरकारने (government) अशा धर्मांध कार्यकर्त्यांना तडीपार करावे अशी मागणी त्यांनी केली.