Goa Election: सध्या गोव्यात एससी, एसटी आणि अन्य मागासवर्गीयांसाठी राखीव मतदारसंघांची मागणी होत आहे. सांगेत मोठ्या प्रमाणात अनुसूचित जमातीचे लोक आहेत. त्यामुळे सांगे मतदारसंघ राखीव होईल, अशी चर्चा आहे.

तसे झाल्यास सांगेचे विद्यमान आमदार सुभाष फळदेसाई काय करणार? असा प्रश्‍न उपस्थित केला जात असता, तसे झाल्यास पक्ष सांगेल तेथून रिंगणात उतरण्याची माझी तयारी आहे. अन्य मतदारसंघांतही माझे काम आहे, असे मंत्री फळदेसाई यांनी सांगितले.

सांगे मतदारसंघ अनुसूचित जमातीसाठी (एसटी) राखीव झाल्यास स्वागतच आहे. तसे झाल्यास पक्ष सांगेल त्या मतदारसंघातून विधानसभा निवडणूक लढण्याची माझी तयारी आहे, असा विश्वास समाजकल्याण मंत्री सुभाष फळदेसाई यांनी व्यक्त केला. सांगे मतदारसंघ अनुसूचित जमातीसाठी (एसटी) राखीव झाल्यास स्वागतच आहे, असा पुनरुच्चार केला.

...तर ‘आयआयटी’ प्रकल्प मागे

एका वृत्तवाहिनीला दिलेल्या मुलाखतीत ते आयआयटी प्रकल्पाबद्दलही बोलले. आयआयटीसाठी जमीन कमी पडल्यास माझी जमीन देण्यास मी सिद्ध आहे. आयआयटीला 30 टक्क्यांहून अधिक स्थानिकांचा विरोध झाल्यास आयआयटी प्रकल्प मागे घेऊ, असेही ते म्हणाले.

उद्योग-व्यवसाय सुरूच राहावेत!

पर्यावरण संवेदनशील क्षेत्राला माझा विरोध नाही. या भागात फार पूर्वीपासून घरे आहेत. अभयारण्यामुळे भूमिगत वीजवाहिनी घालण्यात अडचण येत आहे. सांगे तालुका मागास आहे. सध्या सुरू असलेले उद्योग पर्यावरण संवेदनशील क्षेत्र झाल्यानंतरही सुरूच राहावेत. नव्या उद्योगांवर बंधने घालायला हरकत नाही. या क्षेत्रातील खाणी टप्प्याटप्प्याने बंद कराव्यात, असे तज्ज्ञ समितीच्या सदस्यांना सांगितले आहे, असे मंत्री फळदेसाई यांनी स्पष्ट केले.