मानवी तस्करी ही आजची प्रमुख समस्या आहे; गोव्यातील काही तरुणांना कामाच्या नावाखाली इतर देशांमध्ये नेले जाते, मात्र प्रत्यक्षात त्यांची तस्करी केली जाते; काही लोक एजंटांमार्फत परदेशात नोकरी मिळवण्यासाठी लाखो रुपये भरले आहेत असा दावा करून माझ्याकडे आले आहेत; असे मुख्यमंत्री प्रमोद सावंत यांनी यावेळी बोलताना सांगीतले.

(Human trafficking is a major problem today says CM Pramod Sawant)

काही लोक एजंटांमार्फत परदेशात नोकरी मिळवण्यासाठी लाखो रुपये भरतात नंतर इतर देशांमध्ये त्यांचा छळ केला जातो आणि काहींना अटक देखील केली जात असल्याचे त्यांनी सांगीतले; दरम्यान, पोलिसांनी अशा प्रकरणांमध्ये सक्रिय व्हावे आणि कोणी तक्रार करेपर्यंत थांबू नये असे आवाहन मुख्यमंत्री प्रमोद सावंत यांनी पोलिसांना केले.

'राज्यात मानवी तस्करी खपवून घेणार नाही'

गोव्यात लैंगिक कारणासाठी मानवी तस्करी खपवून घेतली जाणार नाही, असे मुख्यमंत्री प्रमोद सावंत यांनी स्पष्ट केले. लैंगिक तस्करीची 93 टक्के प्रकरणे राज्याबाहेरील असल्याचे त्यांनी सांगितले.

राज्यात वेश्‍या व्यवसायासाठी मानवी तस्करीची परिस्थिती हाताळण्यासाठी संबंधित यंत्रणा सुसज्ज आहे की नाही, याची पाहणी करण्यासाठी राज्यात प्रशिक्षण कार्यक्रम आयोजित केला जाईल, असेही त्यांनी सांगितले. पोलिसांकडून पीडित-अनुकूल बचाव, उपविभागीय दंडाधिकाऱ्यांकडून पीडित-अनुकूल चौकशी आणि देहविक्री व्यवसायात अडकलेल्या महिलांसाठी ‘अन्यायरहीत जिंदगी’ या अशासकीय संघटनेकडून पर्यायी उपजीविकेची तरतूद अशा काही उत्तम पद्धती राज्यात राबविल्या जात आहेत.

या गोष्टींची इतर राज्यांतही अंमलबजावणी होणे गरजेचे आहे, असे सावंत यांनी सांगितले.
लैंगिक तस्करी हा मुली आणि महिलांवरील हिंसाचाराचा सर्वांत वाईट प्रकार आहे. राज्य सरकार केंद्र सरकारच्या सहकार्याने देशांतर्गत आणि आंतरदेशीय तस्करी नियंत्रित करण्यासाठी उपाय योजणार असल्याचे आश्वासन सावंत यांनी दिले.

- तस्करीबाबत संशोधन अहवाल सादर

राज्यातील लैंगिक तस्करी या विषयावर चर्चा करण्यासाठी सावंत यांनी 'अन्यायरहीत जिंदगी'चे संचालक अरुण पांडे यांच्यासोबत बैठक घेतली. यावेळी पांडे यांनी गोव्यातील तस्करीबाबत संशोधन अहवाल सादर केला. पांडे यांनी मुख्यमंत्र्यांना सांगितले की, गोवा हे लैंगिक तस्करीसाठी मुख्य गंतव्य राज्यांपैकी एक आहे. लैंगिक तस्करीशी लढा देत असताना संबंधित यंत्रणांसमोर येणाऱ्या आव्हानांबद्दलही पांडे यांनी मुख्यमंत्र्यांना माहिती दिली.