पणजी: जीवनात हरप्रकारचा अनुभव घेणे महत्त्वाचे असत, कारण अनुभवातूनच माणूस शिकत असतो, समृद्ध होत असतो. केवळ सुंदर गोष्टी बघून त्याबाबत व्यक्त होणे इथपर्यंत मर्यादित राहता कामा नये. कुरुपतेतही सौंदर्य शोधता आले पाहिजे. जीवनातील वेदनांचा अनुभव घेता आला, तरच त्या मांडता येतात, असे प्रतिपादन ललित लेखिका रश्मी कशेळकर यांनी येथे केले.

गोवा मराठी अकादमी आयोजित ''स्त्रीसंगम वंदेमातरम'' महिला मराठी संमेलनाच्या उद्‍घाटन समारंभात त्या प्रमुख पाहुण्या म्हणून बोलत होत्या. यावेळी गोवा मराठी अकादमीच्या कार्यकारिणी सदस्या पौर्णिमा केरकर, सदस्य सचिव मंदार नाईक व अध्यक्ष प्राचार्य अनिल सामंत उपस्थित होते. (Rashmi Kashelkar News updates)

त्या पुढे म्हणाल्या, उत्तम लेखनासाठी ऐकण्याची कला अवगत असणेदेखील आवश्यक आहे. आपल्या भावना प्रत्येकवेळी व्यक्त करणे खूप गरजेचे असते. म्हणूनच तुम्ही निसर्गाशी, कागदांशी नाते जोडले पाहिजे. त्यांच्याजवळ व्यक्त झाले पाहिजे .

प्राचार्य सामंत यांनी यावेळी नकारात्मक विचारांना स्वतःपासून दूर ठेवले पाहिजे असे सांगितले. उद्‍घाटन समारंभानंतर झालेल्या परिसंवादात कशेळकर यांच्यासह समाज शिक्षण अभ्यासक सुमन सामंत सहभागी झाल्या होत्या.

प्रा. गीता गावस यांनी त्यांच्याशी संवाद साधला. वेगळ्या वाटा या विषयावरील परिसंवादात दोन्ही वक्त्यांनी आपापले विचार मांडले. स्त्रियांवर परंपरेने येणारी बंधने त्यांनी बाजूला सारली पाहिजेत. त्यांनी नव्याने आपले अवकाश शोधले पाहिजे असा सूर परिसंवादात उमटला.तिसऱ्या सत्रात स्मरुनी गोमंतदेवी हा नृत्य, नाट्य, काव्य, गीत, संगीत, पोवाड्याचा सांस्कृतिक कार्यक्रम सादर करण्यात आला. पौर्णिमा केरकर यांनी स्वागत व प्रास्ताविक केले. मंदार नाईक यांनी आभारप्रदर्शन केले.