हणजूणमध्‍ये महिला पत्रकारास धमकी; तिघांविरोधात तक्रार

शिवोली: हणजूण समुद्रकिनारी एका रेस्टॉरंटमध्ये मध्यरात्रीपर्यंत कर्णकर्कश संगीत वाजवून ध्वनिप्रदूषण होत असल्याची तक्रार होती. त्यास अनुसरून तेथे वार्तांकनास गेलेल्या पत्रकार अस्मिता पोळजी यांना शिवीगाळ करून मारहाणीची धमकी दिल्याची तक्रार तिघांविरोधात हणजूण पोलिसांत दाखल करण्यात आली आहे. अस्मिता पोळजी तसेच साईप्रसाद कुबडे यांनी ही तक्रार दिली आहे.

या प्रकरणातील तिघेही संशयित फरार असून पोलिस त्यांचा शोध घेत आहेत, असे पोलिस उपनिरीक्षक स्नेहा सावळ यांनी सांगितले. हणजूण-वागातोर परिसरात बार-रेस्टॉरंटवाल्यांकडून कर्णकर्कश संगीत वाजवले जाते. याबाबत उत्तर गोवा जिल्हाधिकारी कार्यालय, स्थानिक हणजूण-कायसूव पंचायत तसेच हणजूण पोलिसांत ग्रांमस्थांकडून तक्रारी दाखल करण्यात आल्या आहेत. मात्र, संबंधितांवर कारवाई करण्यात आली नसल्याची माहिती आलिशा डिसौझा यांनी दिली.