पणजी: राज्यातील हॉटेले व रेस्टॉरंटना 50 टक्के क्षमतेने ग्राहक घेऊन ती खुली करण्याची परवानगी देण्याचा विचार सरकारने चालवला आहे. मुख्यमंत्री डॉ. प्रमोद सावंत यांनी तसे सुतोवाच आज केले आहे. राज्यातील संचारबंदी सोमवार ता. 5 रोजी सकाळी 7 वाजता संपणार होती. ती आता 12 जुलैपर्यंत वाढवण्यात आली आहे. मुख्यमंत्र्यांनी तशी घोषणा काल केली आहे. ही संचारबंदी वाढवताना यापूर्वी दुकाने, बाजार, आस्थापने यांना संध्याकाळी 3 वाजेपर्यंत उघडण्याची जी परवानगी होती त्यात वाढ करून संध्याकाळी 6 वाजेपर्यंत करण्यात आली आहे. त्याचसोबत आत्तापर्यंत बंद असलेली सलून व उघड्यावरील क्रीडा संकुले खोलण्यास परवानगी देण्यात आली आहे. (Hotels and restaurants in Goa have been allowed to open at 50 per cent capacity)

सिनेमा थिएटर, जलतरण तलाव, कसिनो हे मात्र बंदच राहणार आहेत. राज्यातील हॉटेल, रेस्टॉरेंटचालकांनी मुख्यमंत्र्याकडे हॉटेल रेस्टॉरेट उघडण्याची परवानगी देण्याची मागणी केली होती. त्या मागणीला अनुसरून 50 टक्के ग्राहक घेऊन हॉटेले व रेस्टॉरेंट उघडण्याची परवानगी देण्याचा मनोदय मुख्यमंत्र्यांनी व्यक्त केला आहे.