Crime News : सांगोल्डा येथील एका रिसॉर्टमधून 45 हजारांची रोकड तसेच एक दुचाकी मिळून एकूण 85 हजारांचा मुद्देमाल चोरीस गेला होता. याप्रकरणी साळगाव पोलिसांनी सांतू बबलू दास (झारखंड) या संशयित हॉटेल कामगारास अटक केली.

चोरीची घटना 24डिसेंबर रोजी घडली होती. संशयित आविनो व्हिला रिसॉर्टमध्ये कामाला होता. संशयिताने रिसॉर्टच्या रिसेप्शन काऊंटरमधील 45हजार रुपये आणि रिसॉर्टबाहेर उभी केलेली अ‍ॅक्टिवा (जीए 03- एसी 1897) दुचाकी घेऊन पळ काढला होता.

हा चोरीचा प्रकार समजल्यानंतर हॉटेलमालक पारस आगरवाल यांनी साळगाव पोलिसांत तक्रार दिली होती. त्यानुसार पोलिसांनी चौकशी केली असता, संशयित आपल्या मूळ गावी झारखंडला गेल्याची माहिती उघडकीस आली होती.

यावेळी कुंकळ्ळी पोलिस पथक झारखंडमध्ये होते. या पथकाला साळगाव पोलिसांनी संशयिताची माहिती पुरवली. त्यानुसार स्थानिक पोलिसांनी संशयितास दुचाकीसह पकडून साळगाव पोलिसांच्या स्वाधीन केले.

त्यानंतर पोलिसांनी संशयितास रितसर अटक केली. पोलिस निरीक्षक मिलिंद भुईंबर यांच्या मार्गदर्शनाखाली पुढील तपास उपनिरीक्षक अतिकेश खेडेकर करत आहेत.