पणजी: सांगोल्डा येथील किस्मूर- वाईन- डायन - लेझ या हॉटेलमध्ये मंगळवारी साडेसात ते साडेआठ या दरम्यान आठ पोलिस कर्मचारी जेवण व मद्यपानासाठी आले होते. बाजारभावापेक्षा या हॉटेलमधील जेवणाचे दर अधिक असल्याचे कारण देत हॉटेल मालकाशी हुज्जत घालून शिवीगाळ करण्याचा प्रकार घडला आहे.

(Hotel owner in Sangolda, dispute with police)

याबाबत सविस्तर माहिती अशी की, हॉटेलमध्ये वास्को येथील तीन, वाहतूक खात्यातील दोघे, कंळगुट व अंजुणा येथील प्रत्येकी एक व मडगावमधील एक असे आठ पोलिस साडेसात ते साडेआठच्या दरम्यान सांगोल्डा येथील किस्मूर- वाईन- डायन - लेझ या हॉटेलमध्ये आले होते. गटारी अमावास्या लागण्यापूर्वी कोटा पूर्ण करण्यासाठी सुरवातीला मद्य व चकणा घेतला. लहरीप्रमाणे ऑर्डर दिल्या गेल्या. नंतर जेवणासाठी रोटी, चिकन, पुलाव, वैगेरेची ऑर्डर देऊन जेवणावर ताव मारला. बाजारभावापेक्षा या हॉटेलचे दर जास्त असल्याचा बनाव करून वाद सुरू केला. इतर ठिकाणी बिअरचे दर कमी असताना तुम्ही जास्त दर का आकारता? असे विचारले असता आमचे दर मेनूकार्डप्रमाणे असल्याचे वेटरांनी सांगितले. त्यानंतर पोलिसांनी हॉटेल मालकाला अर्वाच्च भाषेत शिवीगाळ केली. पर्यटनमंत्री रोहन खंवटे यांचे हॉटेल मालक नातेवाईक असल्याचे समजते.

वाहनांच्या नंबर प्लेटवरून काढला माग

हॉटेल मालकाच्या कर्मचाऱ्यांनी वाद घालणाऱ्या पोलिसांच्या वाहनांचे क्रमांकांचे फोटो काढले होते. या फोटोवरून त्यांचा माग काढण्यात आला. साळगावचे पोलिस निरीक्षक सचिन लोकरे यांच्याशी हॉटेल मालकाने संपर्क साधला असता, यासंदर्भात कुठलाही गुन्हा दाखल करण्यात आला नसून, शिवीगाळ केल्यामुळे अदखलपात्र तक्रारीची नोंद झाली आहे.