Honda News : पिसुर्ले, पर्येच्या आमदार डॉ. दिव्या राणे यांच्या प्रयत्नांतून होंडा येथे उभारण्यात येणाऱ्या नियोजित वीज उपकेंद्राला पंचायतीच्या मालकीची जमीन देण्याच्या ठरावाला अखेर मंजुरी मिळाली.

त्यामुळे वीज उपकेंद्र उभारणीचा मार्ग मोकळा झाला आहे, या संबंधीचा ठराव रविवार, ७ रोजी झालेल्या ग्रामसभेत मंजूर करण्यात आला.

या पंचायत क्षेत्रातील वीज समस्या संपुष्टात आणण्यासाठी आमदार डॉ.दिव्या राणे यांनी विशेष लक्ष घालून वीज उपकेंद्र उभारण्याचा प्रस्ताव तयार केला होता, मात्र सदर केंद्र उभारण्यासाठी सुमारे ५ हजार चौ.मी. जागेची गरज असल्याने हे केंद्र कुठे उभारावे, असा प्रश्न निर्माण झाला होता. त्यामुळे होंडा पंचायत क्षेत्रातील ग्रामस्थांनी ग्रामसभेत या प्रकल्पाला मान्यता दिल्याने हा प्रश्न संपुष्टात आला आहे.

या पंचायत क्षेत्रात वीज उपकेंद्र उभारण्याचा प्रस्तावाबाबत पंचायत सचिव मुला वरक यांनी ग्रामसभेत दिली, त्यानंतर साधक बाधक चर्चा करून शेवटी भिमराव राणे व बी. डी. मोटे यांनी अनुमोदन दिले.

यावेळी सरपंच शिवदास माडकर, पंच स्मिता मोटे, निलिमा शेट्ये, कृष्णा गावकर, सुशांत राणे, प्रमोद गावडे, नीलेश सातार्डेकर, दीपक गावकर, पंचायत सचिव मुला वरक, तर बीडीओतर्फे निरीक्षक म्हणून दिनेश माईणकर हे अधिकारी उपस्थित होते.

सदर प्रकल्प केंद्र व राज्य सरकारच्या सहकार्याने उभारण्यात येणार आहे, त्यामुळे ग्रामीण भागातील वीज समस्या संपुष्टात येईल.सध्याचे वीज उपकेंद्र हे वाळपईत आहे. त्यामुळे वेळ व पैसा खर्च करून वाळपईला जावे लागते. या भागात वीज उपकेंद्र झाल्यास सर्व सुविधा इथेच उपलब्ध होणार आहेत.

- डॉ. दिव्या राणे,आमदार-पर्ये

पाणीप्रश्‍न सोडवा !

ग्रामसभेत उपस्थित महिलांनी ओवळिये गावातील पाण्याचा प्रश्न गंभीर बनला असून नळाला पाणी येत नाही, तर टॅंकर द्वारे होणारा पुरवठा व्यवस्थित होत नसल्याचे सांगितले.