GMC Admission News: गोवा मेडिकल कॉलेजमधील आरक्षणानुसार झालेल्या पदव्युत्तर अभ्यासक्रमाच्या प्रवेशावरील स्थगिती गोवा खंडपीठाने उठवली. आता प्रवेश प्रक्रिया ठरलेल्या वेळापत्रकानुसार होईल. याबाबतच्या याचिकेवरील सुनावणी पुढे ढकलली असून पुढील सुनावणी आता 4 सप्टेंबर रोजी होईल.

गोवा वैद्यकीय महाविद्यालयातील यंदाच्या शैक्षणिक वर्ष 2023-24 साठी पदव्युत्तर अभ्यासक्रमासाठी आरक्षण ठेवण्याच्या गोवा सरकारच्या अधिसूचनेला वैद्यकीय पदवी विद्यार्थ्यांनी आव्हान दिले आहे.

मागील सुनावणीवेळी गोवा खंडपीठाने सरकारसह इतर प्रतिवाद्यांना नोटीस बजावली होती.. वैद्यकीय पदवीधर विद्यार्थी मोहनिश अरुण सरदेसाई याच्यासह 68 विद्यार्थ्यांनी ही आव्हान याचिका सादर केली आहे. वैद्यकीय पदव्युत्तर अभ्यासक्रमासाठी आरक्षण ठेवण्याचा सरकारने 5 मे 2023 रोजी घेतला होता.

या अभ्यासक्रमासाठी आरक्षण देण्यासाठी समाजकल्याण खात्याने रोस्टर तयार केलेला नाही. या अभ्यासक्रमासाठी गोव्यातील विद्यार्थ्यांसाठी जागा आरक्षणासाठी ठेवल्यास सर्वसाधारण गटातील विद्यार्थ्यांना प्रवेश मिळणार नाही, याची भीती आहे, असे या याचिकेत म्हटले आहे.