Noise Pollution In Goa: गोव्यातील पर्यटन हंगामाला सुरूवात झाली आहे. गोव्यात येणाऱ्या पर्यटकांसाठी वेगवेगळ्या पार्ट्या आयोजित केल्या जातात. कानठळ्या बसवणाऱ्या संगीत पार्ट्यांमुळे राज्यात ध्वनी प्रदूषणाची समस्या निर्माण झाली आहे. यावर आता मुंबई उच्च न्यायालयाच्या गोवा खंडपीठाने गोव्यातील (High Court of Bombay at Goa) संगीत पार्ट्या आणि आणि खुल्या मैदानातील आवाजावर मर्यादा घातल्या आहेत.

(Curb On Noise Pollution In Goa)

उच्च न्यायालयाने आज झालेल्या सुनावणीत प्रदुषण नियंत्रण मंडळ आणि दोन्ही जिह्याचे सहाय्यक पोलिस आयुक्त आणि सहाय्यक जिल्हाधिकारी यांना ध्वनी प्रदुषण उल्लंघनावर लक्ष ठेवण्याचे आदेश दिले आहेत. तसेच, रात्री दहानंतर ठराविक मर्यादेच्या वरती आवज गेल्यास संबधितांवर कारवाईचे आदेश दिले आहेत. याशिवाय दक्षिण व उत्तर पोलिस अधिक्षकांना 13 डिसेंबरपर्यंत अॅक्शन प्लॅन सादर करण्याचे आदेश दिले आहेत.

ॲड. कार्लुस फेरेरा (Carlos Feriera) यांनी याबाबत माहिती देताना असे सांगितले की, "रितसर परवानगी घेऊन रात्री दहापर्यंत संगीत वाजवण्यास न्यायालयाने परवानगी दिली आहे. दहानंतर खुल्या जागेत संगीत वाजवण्यास न्यायालयाने बंदी घातली आहे. याची जबाबदारी पोलिस आणि जिल्हाधिकारी कार्यालयाकडे सोपविण्यात आली आहे. तसेच, 15 सण- उत्सव आहेत त्यासाठी संगीत चालवण्याची परवानगी घ्यावी लागेल."

अंजुना-वागादोर परिसरातील काही हॉटेल्समध्ये मोठ्या आवाजात गाणी- संगीत लावून उपद्रव केल्याच्या जनहित याचिका दाखल झाल्या आहेत. या भागात संध्याकाळी 6 ते दुसऱ्या दिवशी सकाळी 6 वाजेपर्यंत इलेक्ट्रॉनिक डान्स म्युझिक (EDMS) इव्हेंट, पार्ट्या सुरु असतात. याला या निर्णयामुळे चाप बसणार आहे.