पणजी: गोव्यात गेल्या चार दिवसांपासून मुसळधार पाऊस सुरु असून, राज्यात पावसाचा जोर आणखी वाढण्याची शक्यता हवामान खात्याने वर्तवली आहे. हवामान खात्याने आजपासून तीन दिवस रेड तर त्या पुढील दोन दिवस पावसाचा ऑरेंज अलर्ट जारी केला आहे. त्यामुळे गोव्यात पाऊस अजून धो ..धो.. बरसणार असल्याने नागरिकांना सतर्क राहण्याची सूचना करण्यात आली आहे.

गोवा हवामान खात्याने दिलेल्या माहितीनुसार, गोव्यात आजपासून (२३ मे) २५ मे पर्यंत मुसळधार पाऊस पडण्याची शक्यता आहे. तर, २६ आणि २७ मे या दोन दिवसांसाठी ऑरेंज अलर्ट जारी केला आहे. तसेच, २८ आणि २९ मे रोजी यलो अलर्ट जारी करण्यात आला आहे. यामुळे पुढील सात दिवस राज्यात मुसळधार पाऊस पडण्याचा अंदाज हवामान खात्याने वर्तवला आहे.

शुक्रवारी (२३ मे) राज्यात अनेक ठिकाणी मुसळधार पावसाची शक्यता असून, या काळात ५० ते ६० किलो मीटर प्रतितास वेगाने वारे वाहण्याचा अंदाज व्यक्त करण्यात आला आहे. दोन्ही जिल्ह्यातील नागरिकांना सतर्क राहण्याचा इशारा हवामान खात्याने दिला आहे.

गेल्या तीन दिवसांपासून राज्यात पावसाचा कहर सुरुच आहे. अनेक ठिकाणी रस्त्यावर मोठ्या प्रमाणावर पाणी साचल्याचे दिसून आले. राज्यात पडझडीच्या घटना सुरुच आहेत. विविध ठिकाणी झाडे कोसळल्याने घरांचे नुकसान झाले. दरम्यान, पुढील तीन दिवस रेड अलर्ट दिल्याने नागरिकांना सतर्क राहण्याची सूचना हवामान खात्याने केली आहे.