म्हापसा: मुसळधार पावसामुळे बार्देशातील भातशेतीचे मोठ्या प्रमाणात नुकसान झाले आहे. या नुकसानीचा पंचनामा करून त्वरित भरपाई मिळावी, अशी मागणी बाधित शेतकऱ्यांनी प्रशासनाकडे केली आहे.

आतापर्यंत बार्देश विभागीय कृषी कार्यालयाजवळ ९५० बाधितांनी नुकसान भरपाईसाठी अर्ज केले असून, ही हानी ६९ लाख रुपयांपर्यंत गेली आहे. हा आकडा आणखीन वाढण्याची शक्यता आहे. जवळपास २५० हेक्टर भातशेती पाण्याखाली गेली आहे. राज्य सरकारने शेतकऱ्यांना तातडीने नुकसान भरपाई देण्याची व्यवस्था करावी.

सर्व्हे करण्यास सुरवात

कृषी अधिकाऱ्यांनी सांगितले की, बार्देशात मुसळधार पावसामुळे भातशेतीला फटका बसला आहे. आतापर्यंत ९५० जणांनी विभागाकडे भरपाईसंदर्भात अर्ज केले आहेत. आम्ही सर्व्हे करण्यास सुरवात केली असून, नुकसानीचा हा आकडा अंदाजे ५९ लाखांपर्यंत गेला आहे. अजूनही अर्ज येत आहेत.