वाळपई-सय्यद नगर येथे घराला आग लागल्याची घटना घडली आहे. ही घटना गुरुवारी रात्री सय्यद नगर येथील शेतकी विभागीय कार्यालयाजवळील परिसरात घडली. या आगीत घराचे नुकसान झाले आहे. घटनेची माहिती मिळताच वाळपई अग्नीशमन दलाच्या जवानांनी घटनास्थळी दाखल होत आगीवर नियंत्रण मिळविले.

याबाबत अधिक माहिती अशी की, शेतकी विभागीय कार्यालयाजवळ असलेल्या उस्मान फतिफ यांच्या घराला काल रात्री एकच्या दरम्यान आग लागली. घटनेची माहीती मिळताच वाळपई अग्नीशमन दलाचे साहाय्यक अधिकारी अनंत गावस, बाबूराव गावस, डीपीटी. अमोल चोर्लेकर, फायर फायटर कालिदास गावकर आदींनी घटनास्थळी दाखल होत आगीवर नियंत्रण मिळविले. त्यासाठी पाण्याचा एक बंब वापरण्यात आला. आगीत सुमारे ९५ हजार रुपयांचे नुकसान झाले आहे. शॉर्ट सर्किट होऊन आग लागल्याचा प्राथमिक अंदाज व्यक्त केला जात आहे.

दरम्यान, राज्यात अशीच एक आगीची घटना समोर आली आहे. मात्र ती आग कारला लागली आहे. आज सकाळी मडगाव जिल्हाधिकारी कार्यालयासमोर एक टाटा इंडिका गाडीने पेट घेतला. आगीत ही गाडी संपूर्ण जळून खाक झाली. सुदैवाने कारचालकाने प्रसंगावधान दाखवून गाडी रस्त्याच्या बाजूला नेऊन पार्क केल्याने त्याने स्वतःचा जीव वाचवण्यासोबतच इतरांनाही आगीच्या धोक्यापासून वाचवलं.