Verna Pharma Companies : राज्यातील अनेक कंपन्यांमधील कामगारांनी युनियनची स्थापना केली आहे. मात्र, वेर्णा औद्योगिक वसाहतीमधील कर्मचाऱ्यांनी अखिल भारतीय ट्रेड युनियन कॉंग्रेस संघटनेमार्फत युनियनची स्थापना केल्याने कर्मचाऱ्यांच्या बदल्या करण्याचे प्रकार सुरू असून याबाबत सरकार तसेच कामगार आयोग मौन बाळगून असल्याची टीका कामगार नेते सुहास नाईक यांनी केली.

ते आझाद मैदान येथे फार्मा कर्मचाऱ्यांनी केलेल्या धरणे आंदोलनावेळी बोलत होते. यावेळी ‘आयटक’चे राजू मंगेशकर, ख्रिस्तोफर फोन्सेका उपस्थित होते. फार्मा कंपनी व्यवस्थापनाद्वारे १२ तास काम करून घेऊन कर्मचाऱ्यांना आठ तासांचे वेतन देण्यात येते. त्यांना सुट्टी दिली जात नाही.

कंपनीचे म्हणणे न ऐकल्यास हिमाचल किंवा महाराष्ट्रात बदली करण्याच्या धमक्या दिल्या जातात. सुमारे १५ वर्षांपासून काम करणाऱ्या कर्मचाऱ्यांना अशी वागणूक देणे कितपत योग्य आहे, असा प्रश्‍न राजू मंगेशकर यांनी केला. फोन्सेका म्हणाले, आतापर्यंत अनेक कंपन्यांनी कर्मचाऱ्यांच्या बदल्या केल्या, तर काहींना कामावरून काढून टाकले आहे.

कामगार आयोगाची चुप्पी

कामगारांच्या विरोधात पोलिस यंत्रणेचा वापर करण्यात येत आहे. कामगारांची सतावणूक होत आहे. याबाबत कामगार आयोगाला कळविले आहे. तरीदेखील कामगार आयोग, कामगार मंत्री तसेच सरकार शांत आहे. आम्ही हा विषय शांतताप्रिय मार्गाने सोडवू इच्छितो. त्यामुळे सरकारने याप्रश्‍नी योग्य ती कारवाई करणे गरजेचे असल्याचे सुहास नाईक यांनी सांगितले.

कर्मचाऱ्यांच्या प्रमुख मागण्या

• कंपन्यांकडून कामगारांची सतावणूक बंद करावी.

• कर्मचाऱ्यांची हिमाचल वा इतर राज्यांत बदली करू नये.

• अतिरिक्त कामाचा मोबदला (वेतन) द्यावा.

• कर्मचाऱ्यांना आवश्‍यक त्या सुविधा पुरवाव्यात.