अखेर मडगावच्या बहुस्तरीय पार्किंग प्रकल्पाला चालना मिळण्याचे संकेत द गोवा राज्य नागरी विकास एजन्सी (जीसुडा) ने दिले आहेत. नगरपालिका इमारतीच्या मागे असलेल्या जागेतील मडगाव नगरपालिकेचा हा प्रकल्प गेली कित्येक वर्षे रखडत होता.

त्यानंतर हा प्रकल्प जीसुडाकडे सोपविण्यात आला. जीसुडाने आता या प्रकल्पासाठी ८.३ कोटी रुपयांची निविदा जारी केली आहे.

मडगावमध्ये होत असलेला वाहतुकीचा खोळंबा, पार्किंगसाठी अपुरी पडत असलेली जागा या सर्व समस्या लक्षात घेऊन हा प्रकल्प १८ महिन्यांत पूर्ण करण्याचा उद्देश असल्याचे जीसुडाच्या ज्येष्ठ अधिकाऱ्याचे म्हणणे आहे.

जीसुडातर्फे लवकरच त्यासाठी कंत्राटदाराची नियुक्ती केली जाणार आहे. या बहुस्तरीय प्रकल्पात वाहने ठेवण्यासाठी चार मजले असतील. त्यात ७० चारचाकी व १२४ दुचाकी वाहने ठेवण्याची व्यवस्था असेल, असेही या अधिकाऱ्याचे म्हणणे आहे.

वाद-विवादांत अडकलेला प्रकल्प

या प्रकल्पासाठी नगरपालिकेला सुवर्णमहोत्सवी वर्षानिमित्त राज्य सरकारने अनुदान २०११ साली मंजूर केले होते. २०१५ साली तेव्हाचे उपमुख्यमंत्री फ्रान्सिस डिसोझा यांच्या हस्ते प्रकल्पाची पायाभरणी करण्यात आली होती. या प्रकल्पासाठी जो आराखडा तयार करण्यात आला होता, त्यावरूनही वादंग उठले होते. मध्यंतरी या प्रकल्पात हॉटेलसाठी जागा राखीव ठेवण्याची सूचना केली व त्यावरून मोठा वाद झाला होता.