वास्को: चिखलीतील जॉगर्स पार्कची देखभाल करण्यासाठी चिखली ग्रामपंचायतीकडे पुरेशा निधी उपलब्ध नसल्याने पंचायतीद्वारा देखभाल करणे अवघड बनले आहे. निधीअभावी जॉगर्स पार्कची देखभाल करण्यास पंचायत हतबल ठरत आहे, अशी माहिती चिखलीचे सरपंच सेबेस्तियानो परेरा यांनी दिली.

चिखलीमध्ये सुंदर व मोछा असा जॉगर्स पार्क आहे. या जागर्स पार्कचे उद्‍घाटन तत्कालीन मुख्यमंत्री मनोहर पर्रीकर यांच्या हस्ते करण्यात आले होते. स्व. पर्रीकर यांनीही या पार्कच्या एकून रचनेबद्दल कौतुक केले होते. या पार्कमुळे आसपासच्या रहिवाशांची मोठी सोय झाली आहे. दाबोळी मतदारसंघातील एक भूषण म्हणून या प्रकल्पाकडे पाहिले जाते. परंतु सध्या पंचायतीकडे निधी नसल्याने जॉगर्स पार्कची देखभाल करणे शक्य होत नसल्याचे सरपंच परेरा म्हणाले.

जॉगर्स पार्कची देखभाल पूर्वी गोवा राज्य साधनसुविधा विकास महामंडळ करीत होते. त्यानंतर या जॉगर्स पार्कचा ताबा चिखली पंचायतीकडे देण्यात आला. परंतु एवढ्या मोठ्या प्रकल्पाची देखभाल करण्यासाठी चिखली पंचायतीकडे पुरेशा निधीच नाही. त्यामुळे या प्रकल्पाच्या देखभालीकडे दुर्लक्ष होत आहे. सद्यःस्थितीत पाण्याअभावी या पार्कमधील हिरवळ, लहान रोपटी सुकली आहेत. करमणुकीच्या आसनांची व काही वस्तूंची मोडतोड झाल्याने दुरुस्तीची गरज बनली आहे. जॉगर्स पार्कमधील हिरवळ सुरक्षित राहण्यासाठी व इतर रोपट्यांसाठी प्रतिदिन दहा टॅंकर पाण्याची गरज आहे. परंतु सध्या केवळ आठवड्यातून एकदाच हिरवळ, रोपट्यांना पाणी देत असल्याचे सरपंच परेरा यांनी सांगितले.