Mormugao, Vasco: वास्को येथील मुरगाव बंदरावर उतरलेल्या जवळपास शंभर अमेरिकन प्रवाशांना टॅक्सीने प्रवास करण्यासाठी वेठीस धरल्याची घटना बुधवारी घडली. प्रवाशांना बसने प्रवास करण्यासाठी अडवणूक करून त्यांना अधिक काळासाठी जबरदस्तीने थांबवून ठेवले होते. याप्रकरणाची गोवा सरकारने गंभीर दखल घेतली असून, मुख्यमंत्री प्रमोद सावंत (CM Pramod Sawant) यांनी देखील टॅक्सी चालकांची दादागिरी खपवून घेतली जाणार नाही असा सज्जड दम देखील दिला.

मुरगाव येथे क्रुजने (Mormugao Port) आलेल्या अमेरिकन पर्यटकांना बसने प्रवास करण्यास टॅक्सी चालकांनी रोखल्याची घटना निषेधार्ह आहे. अशा प्रकारे कोणी करत असल्यास त्याविरोधात सक्त कारवाई केली जाईल. तसेच, टॅक्सी चालकांनी बस चालकांना धमकावल्यास तर टॅक्सी चालकांना अटक केली जाणार आहे. असे मुख्यमंत्री डॉ. प्रमोद सावंत म्हणाले. शिवाय घडलेल्या प्रकरणात पोलिसांनी सखोल तपास करण्याची सूचना देखील मुख्यमंत्र्यांनी दिली आहे.

दरम्यान, आता या प्रकरणावरून पर्यटनमंत्री रोहन खंवटे (Tourism Minister Rohan Khaunte) यांनी देखील टॅक्सी चालकांना मोठा इशारा दिला आहे. मंत्री खंवटे म्हणाले, मुरगाव, वास्को सारखे प्रकरण पुन्हा घडले तर, संबधित टॅक्सी चालकाचा थेट परवाना रद्द केला जाईल. असा इशारा मंत्री खंवटे यांनी टॅक्सी चालकांना दिला आहे. त्यामुळे यापुढे टॅक्सी चालकांनी पर्यटकांवर मुजोरी केल्यास त्यांच्यावर थेट परवाना रद्दची कारवाई होणार आहे.