मडकई: गोविंद गावडे यांच्या भारतीय जनता पक्षातील प्रवेशामुळे पक्षाची ताकद वाढली असून भाजपमधील मूळ कार्यकर्ते अजूनही पक्षाबरोबर आहेत. पक्षाचा आदेश हा त्यांच्यासाठी सर्वोच्च आहे आणि पंधरा वर्षानंतर प्रियोळमध्ये (Priol) कमळ फुलवण्यास आम्ही सज्ज असल्याचे प्रियोळ भाजप मंडळाचे नवनिर्वाचित अध्यक्ष दिलीप नाईक यांनी सांगितले. (Govind Gawdes entry into the BJP increased the strength of the part)

मंगळवारी गावडे (Govind Gawde) यांना प्रवेश दिल्यामुळे नाराज झालेल्या भाजप (BJP) पदाधिकाऱ्यांनी राजीनामे दिले. त्यांनी भाजपच्या कार्यशैलीवर टीकास्‍त्र सोडले होते. त्या टीकेला प्रत्युत्तर म्हणून पत्रकार परिषद झाली. राज्य कार्यकारिणी सदस्य दिगंबर तारी, सरचिटणीस शिवराम नाईक, सत्यवान शिलकर, वैशाली नाईक आदी कार्यकर्ते व पदाधिकारी उपस्थित होते.

दिलीप नाईक म्हणाले, ज्यांनी राजीनामे दिले त्यांचे पक्षाकरिता योगदान नगण्य होते. आपल्या स्वार्थासाठी त्यांनी राजीनामे दिले आहेत. 90 टक्के पदाधिकाऱ्यांनी राजीनामा दिला हा त्यांचा दावासुध्दा खोटा आहे. बहुसंख्य कार्यकर्ते गोविंद गावडे यांच्याबरोबर व पक्षाबरोबर आहेत. प्रियोळमध्ये विकास करताना गावडे यांनी कसलाच भेदभाव केला नाही. गावडे यांनी भाजपच्या मूळ कार्यकर्त्यांवर अन्याय केला असे म्हणणे पूर्णपणे चुकीचे आहे.

महेश शिलकर यांनी मतदारसंघात भाजपचे दहा हजार पाचशे सभासद असल्याचे म्हटले आहे, ते सुध्दा चुकीचे आहे. इतरांनीही यावेळी प्रियोळमध्ये भाजप अधिक बलवान झाल्याचे नमूद केले.