काणकोण: गोवा संपूर्ण यात्रा कार्यक्रमाअंतर्गत काणकोण तालुक्यातील 25 मूत्रपिंड रूग्णांना डायलेसीससाठी आर्थिक मदतीचे धनादेश राज्यपाल श्रीधन पिल्लई यांनी आज दिले.पंतप्रधानाच्या 71 वाढदिवसानिमित्ताने राज्यातील लोकांना भेटून पीडितांना आर्थिक मदत देण्याचे ठरविले होते. त्यावेळी ही संख्या 71 वर मर्यादित ठेवण्यात आली होती, मात्र आता पर्यत 200 डायलेसीस रूग्णांना आर्थिक मदत दिल्याचे राज्यपाल श्रीधरन पिल्लई यांनी सांगितले. त्याचप्रमाणे शंभर पेक्षा जास्त संस्थांना आर्थिक मदत दिली आहे.

या आर्थिक मदतीच्या वितरणासाठी श्रीस्थळ पंचायत सभागृहात खास कार्यक्रमाचे आयोजन करण्यात आले. गोव्यातील देवालयांचा अभ्यास करून त्याच्या संदर्भात लवकरच हिंदी, इंग्रजी व अन्य भाषांत पुस्तक तयार करण्याचा मनोदय राज्यपालांनी श्री परशुराम देवालयाला भेट दिल्यावेळी व्यक्त केला. गोव्याचा खरा चेहरा ग्रामीण भागात आहे. राज्याची खरी ओळख व संस्कृती ग्रामीण भागात वसली आहे.त्या ग्रामीण संस्कृतीचे जतन व संवर्धन होण्याची गरज राज्यपाल पी.एस.श्रीधरन पिल्लई यांनी श्रीस्थळ पंचायत सभागृहात बोलताना सांगितले.

येथील सरपंच व पंच यांच्याशी संवाद साधत राज्यपालांनी त्याच्या गावच्या समस्या जाणून घेतल्या.यावेळी सभापती रमेश तवडकर यांनी सरपंच व पंचानी पंचायत क्षेत्रातील काही मोजक्याच समस्या मांडल्यात. ग्रामीण भागात अनेक समस्या आहेत काणकोणसह राज्याचा विकास होण्यासाठी प्रयत्नशील राहणार असल्याचे सभापतीनी सांगितले. श्री मल्लिकार्जुन देवालयात देवालयाचे नूतन अध्यक्ष विठोबा देसाई व माजी अध्यक्ष राजेंद्र देसाई यांनी राज्यपालांचे स्वागत करून त्यांना समई प्रदान केली. यावेळी राजेंद्र देसाई यांनी राज्यपालांना देवालयाचा 1880 सालचा दस्तावेज दाखवला. यावेळी देवालय समितीचे सचिव राजेंद्र भगत, मुख्यत्यार प्रमोद नाईक गावकर, माजी अध्यक्ष अनिल नाईक गावकर, त्याचप्रमाणे उल्हास देसाई, प्रशांत देसाई, भाजप मंडळ अध्यक्ष विशाल देसाई, दिवाकर पागी, हेमंत नाईक गावकर व अन्य उपस्थित होते.