Portuguese Destroyed Temples of Goa

पणजी: गोव्याला लागलेली दृष्ट म्हणजे पोर्तुगीज. पोर्तुगीज १५१० साली गोव्यात आले आणि गोव्यातील जीवन उद्धवस्त करायला सुरुवात केली. त्यांना गोव्यात ख्रिस्ती धर्माचा प्रचार करायचा होता आणि म्हणून त्यांनी गोव्यातील जुनी संस्कृती मिटवून टाकण्यासाठी हिंदू धर्म मिटवून टाकण्यासाठी प्रयत्न सुरु केले. यामध्ये खास करून मंदिरं उद्धवस्त करण्याचा प्रकार घडायचा.

तिसवाडी, बार्देश आणि सासष्टी या तीन तालुक्यांमध्ये पोर्तुगीजांची राजवट होती आणि म्हणूनच हिंदू मंदिरांचं रक्षण करण्यासाठी मंदिरं इतर ठिकाणी हलवण्यात आली होती. जी मंदिरं स्थलांतरित झाली ती आज पाहायला मिळतात मात्र जी मंदिरं पोर्तुगीज राजवटीचा भाग होती त्यांना पोर्तुगीजांनी कायमचं मिटवलं.

गोवा राज्य सरकारने उद्धवस्त केलेली मंदिरं पुन्हा उभी करण्याचं आश्वासन अर्थसंकल्पीय अधिवेशनात दिलं होतं मात्र सरकार अद्याप काम करताना दिसत नाहीये. मंदिरं पुन्हा उभारण्यासाठी पैशांची तरतूद झाली असली तरीही अजून काम का सुरु झालेलं नाही असा प्रश्न कायम राहतो. पोर्तुगिजांनी एक हजारहून अधिक मंदिरं उद्धवस्त केली असण्याची शक्यता आहे आणि या सर्व मंदिराचं मिळून एकाच स्मारक मंदिर उभं राहणार होतं, मात्र सरकारी पातळीवर अजूनही ही प्रक्रिया सुरु झालेली नाही.

पुरातत्त्व आणि पुराभिलेख खात्याचे मंत्री सुभाष फळदेसाई यांनी गोव्यातील एका वृत्तपत्राला दिलेल्या माहितीप्रमाणे काही कारणांमुळे मंदिरबांधणीची प्रक्रिया काही काळ लांबली आहे आणि यावर राज्याचे मुख्यमंत्री डॉ. प्रमोद सावंत लवकरच निर्णय घेणार आहेत.